جنرل سید عاصم منیر، پرتشدد انتہا پسندوں کے خلاف توانا آواز، امریکی جریدے کا شاندار الفاظ میں خراج تحسین

امریکی سنٹرل کمانڈ کے جریدے یونی پاتھ نے جنرل سید عاصم منیر کی شاندار قیادت کا اعتراف کیا ہے، جس میں ان کی پیشہ ورانہ صلاحیتوں اور انسداد دہشتگردی کے خلاف کوششوں کو سراہا گیا ہے۔

امریکی جریدے کے مطابق جنرل سید عاصم منیر کو ایسے لیڈر کے طور پر یاد کیا جائے گا جن کا عزم پاکستان کی سلامتی، استحکام اور خوشحالی ہے۔ انہوں نے نومبر 2022 میں کمان سنبھالنے کے بعد سے دہشتگردی کے خلاف متعدد فوجی آپریشنز کی قیادت کی، جن میں 22,409 انٹیلی جنس پر مبنی آپریشنز شامل ہیں، جس کے نتیجے میں 398 دہشت گردوں کا خاتمہ کیا گیا۔

جنرل منیر نے واضح کیا ہے کہ دہشت گردوں کو ریاست کی رٹ کے سامنے سرتسلیم خم کرنا ہوگا۔ انہوں نے ففتھ جنریشن وارفیئر سے درپیش چیلنجز کا سامنا کرتے ہوئے پاکستان کی خودمختاری کے لیے فوج کی تیاری پر زور دیا۔

یونی پاتھ نے مزید کہا کہ جنرل منیر نے ایران کی طرف سے میزائل حملوں کے بعد اپنے عزم کا اظہار کرتے ہوئے دہشت گردوں کے ٹھکانوں کو نشانہ بنایا۔ انہوں نے معاشی ترقی کے لیے خصوصی سرمایہ کاری سہولت کونسل اور گرین پاکستان انیشیٹو جیسے اقدامات کے ذریعے ملازمتیں پیدا کرنے کی حمایت کی۔

جنرل منیر کے اقلیتوں کے تحفظ اور مذہبی ہم آہنگی کے حوالے سے بھی ان کی تعریف کی گئی، جب کہ ان کی ملٹری ڈپلومیسی کی کوششوں نے امریکہ جیسے ممالک کے ساتھ تعلقات کو مزید مضبوط کیا۔

دفاعی ماہرین کا کہنا ہے کہ یونی پاتھ میں شائع ہونے والا یہ مضمون ایک غیر معمولی اشاعت ہے، جس میں کوئی مبالغہ آرائی نہیں کی گئی۔ اس کا ہر لفظ حقیقت پر مبنی ہے اور اس میں جنرل منیر کی جانب سے دہشتگردی کے خاتمے اور قوم کو یکجا کرنے کی کوششوں کا اعتراف کیا گیا ہے۔

جنرل سید عاصم منیر کی قیادت میں پاک فوج نے ناگہانی آفات سے نمٹنے اور انتخابات کے دوران نظم و نسق برقرار رکھنے میں بھی اہم کردار ادا کیا ہے، جس کی اہمیت کو یونی پاتھ نے تسلیم کیا ہے۔