حکومت جان بوجھ کر حالات کو کشیدگی اور تصادم کی جانب دھکیل رہی ہے، ترجمان پی ٹی آئی

ترجمان پاکستان تحریکِ انصاف نے وزیرِ داخلہ محسن نقوی کی پریس کانفرنس کے حوالے سے کہا ہے حکومت پہلے دن سے حالات کو جان بوجھ کو تصادم اور کشیدگی کی جانب دھکیل رہی ہے۔ عوام خوب اچھی طرح جانتے ہیں کہ ان کا واسطہ کس قماش کے ظالم اور سفّاک کرداروں سے ہے۔

تفصیلات کے مطابق ترجمان پاکستان تحریکِ انصاف نے وفاقی وزیرِ داخلہ محسن نقوی کی پریس کانفرنس پر ردِ عمل دیتے ہوئے کہا ہے کہ نہتے پرامن شہریوں کے خون سے ہولی کھیلنے کے حوالے سے سفّاک سرکار کے عزائم پہلے دن سے واضح ہیں، حکومت جان بوجھ کر حالات کو کشیدگی اور تصادم کی جانب دھکیل رہی ہے۔

ترجمان پی ٹی آئی نے کہا کہ ایک مرتبہ پھر واضح کئے دیتے ہیں کہ ہمارے تمام کارکن مکمل طور پر نہتے اور پرامن ہیں، تشدد ہمارا راستہ ہے نہ کبھی اس کا سہارا لیا ہے۔ انہوں نے کہا کہ پاکستان تحریک انصاف اور عوام ان کی تمام تر فسطائیت اور ظلم و بربریت کے باوجود گزشتہ اڑھائی برس کیطرح آج بھی مکمل طور پر پرامن ہیں۔

ترجمان پاکستان تحریکِ انصاف کا کہنا تھا کہ دو دن سے بدترین شیلنگ کا نشانہ بنانے کے بعد محسن نقوی کی دھمکی کے فورا بعد مظاہرین پر گولیاں برسائی گئیں ہیں اور کم و بیش دو درجن سے زائد نہتے کارکنان کو زخمی کیا گیا ہے۔ انہوں نے واضح کیا کہ اپنے حقوق اور چوری شدہ مینڈیٹ کی واپسی کیلئے نکلنے والے شہریوں کو کھلی دھمکیاں لگانے والوں میں ۹ مئی کے منصوبہ ساز اور ماڈل ٹاؤن میں قتلِ عام کرنے والے سفاک درندے جمع ہیں۔

انکا کہنا تھا کہ پوری دنیا جانتی ہے کہ پولیس، رینجرز اور ایف سی کے مسلّح دستوں کو نہتّے شہریوں کے خلاف اشتعال دلوانے والوں کے حقیقی اہداف کیا ہیں۔ ۹ مئی کو ہائیکورٹ سے عمران خان کو اغوا کرنے کے بعد جلاؤ گھیراؤ کرنے اور کم و بیش دو درجن نہتے شہریوں کو گولیاں مار کر شہید کرنے والے قوم کی نگاہوں سے اوجھل نہیں۔

 ترجمان پاکستان تحریک انصاف نے کہا کہ مقتدرہ کی سرپرستی میں اوباش اور بدمعاش عوام کا مینڈیٹ لوٹ کر حکمران نہ بنائے جاتے اور قانون و انصاف کا کھلا قتل نہ کیا جاتا تو عوام کو آج سڑکوں پر نکلنے کی ضرورت نہ پیش آتی۔ انہوں نے کہا کہ
جو مینڈیٹ چور پولیس، رینجرز اور ایف سی کے مسلّح لشکر کھڑے کرکے ان کے پیچھے چھپے ہوئے ہیں وہی کسی بھی قیمتی جان کے ضیاع کے ذمہ دار ہیں۔

ترجمان پاکستان تحریک انصاف کا کہنا تھا کہ قوم کیا بھول چکی ہے کہ نقوی پنجاب کا کٹھ پتلی وزیراعلیٰ بنایا گیا تو معصوم ظلِ شاہ کو حیوانیت کی بھینٹ چڑھا کر شہید کرنے والے سرکاری درندوں کو بچانے کیلئے عمران خان کو جھوٹے مقدمے میں نامزد کیا گیا، ترجمان پاکستان تحریک انصاف نے کہا کہ پولیس، رینجرز اور ایف سی سمیت تمام سرکاری مشینری عوام کے ٹیکس کے پیسوں سے تنخواہیں پاتے اور عوام کو گولیاں مارنے اور ان پر تشدد کی بجائے ان کے جان و مال کی سلامتی کے ذمہ دار ہیں۔

انہوں نے واضح کیا کہ پرامن احتجاج کیلئے نکلنے والے عوام بھی پولیس اور دیگر اداروں کے عملے سے ہرگز نہیں الجھنا چاہتے بلکہ مکمل سلامتی کا پیغام بھجوا کر ان سے ناجائز سرکار کی اندھی تابعداری کی بجائے قانون کی حکمرانی کے ساتھ کھڑا ہونے کی توقع کرتے ہیں۔

مینڈیٹ چوروں اور خون کے پیاسے وزیروں کو لاشیں دینے کی بجائے قوم صبر، استقامت اور امن کا علم بلند کرتے ہوئے پرامن احتجاج کے تمام جائز اہداف حاصل کریں گے۔ ترجمان پی ٹی آئی نے کہا کہ محسن نقوی میں رتّی بھر شرم و حیا باقی ہے تو مسلّح بندوبست اور رکاوٹیں ہٹا کر شہریوں کو دھمکانے کا سلسلہ بند کریں، لاکھوں پرامن مظاہرین کی آمد و رفت سے ایک گملہ نہیں ٹوٹے گا۔

ترجمان پی ٹی آئی نے واضح کیا کہ یہ ملک، اس کے وسائل اور املاک سب ہمارے ہیں، عمران خان کی کال پر نکلنے والا ہر کارکن ان کا محافظ بنے گا اور مکمل طور پر پرامن رہتے ہوئے احتجاج جیسی آئینی و قانونی سیاسی سرگرمی کو کامیابی تک لے جائے گا۔