طلاق یافتہ بیٹیاں متوفی والد کی پنشن کی حقدار ہیں، سندھ ہائیکورٹ کا فیصلہ

سندھ ہائیکورٹ نے ایک طلاق یافتہ خاتون کی درخواست پر فیصلہ سنایا کہ طلاق یافتہ بیٹیاں بھی اپنے متوفی والد کی ماہانہ پنشن سے حصہ لینے کی حقدار ہیں، اس وقت تک کہ وہ دوبارہ شادی نہیں کرتیں۔

طلاق یافتہ خاتون کی درخواست پر سندھ ہائیکورٹ کے جسٹس محمد کریم خان اور جسٹس نثار احمد بھنبھرو پر مشتمل دو رکنی آئینی بینچ نے سماعت کی، عدالت نے حکام کو ہدایت کی کہ متوفی پنشنر کی ماہانہ پنشن کی رقم طلاق یافتہ بیٹی اور دیگر غیر شادی شدہ/بیوہ کو چار ماہ کی مدت کے مطابق تقسیم کیا جائے۔

ایس ایچ سی کے مطابق متوفی پنشنرز کی طلاق یافتہ اور بیوہ بیٹیوں کو درپیش مصائب اور مشکلات کو سمجھتے ہوئے وزارت خزانہ نے 1983میں پنشن رولز کو تبدیل کرتے ہوئے طلاق یافتہ بیٹیوں کی حیثیت کو بھی غیر شادی شدہ بیٹیوں کے برابر کر دیا گیا تھا۔

درخواستگزار کی جانب سے گزشتہ سال صوبائی حکام کیخلاف سندھ ہائیکورٹ میں درخواست دائر کی گئی تھی اور موقف اختیار کیا تھا کہ اس کے والد 1990میں کالج ایجوکیشن ڈیپارٹمنٹ میں اسسٹنٹ پروفیسر کی حیثیت سے ریٹائر ہوئے تھے اور جنوری 2023میں انتقال کر گئے تھے۔