مہنگائی کے مارے عوام کے لیے ایک اور اچھی خبر، بجلی صارفین کو 51 ارب 49 کروڑ روپے کا بڑا ریلیف دینے کی تیاری کر لی گئی۔
بجلی کی تقسیم کار کمپنیوں نے تیسری سہ ماہی ایڈجسٹمنٹ کی مد میں نیشنل الیکٹرک پاور ریگولیٹری اتھارٹی (نیپرا) میں باضابطہ درخواست جمع کرا دی ۔ نیپرا اس درخواست پر سماعت 29 اپریل کو کرے گی۔ درخواست کے مطابق صارفین کو سب سے بڑا ریلیف کیپسٹی پیمنٹس میں کمی کی صورت میں دیا جائے گا، جس کی مالیت 47 ارب 12 کروڑ روپے ہے۔
اس کے علاوہ ٹرانسمیشن اور ڈسٹری بیوشن نقصانات میں کمی سے 2 ارب 4 کروڑ روپے، جبکہ مین یوز آف سسٹم چارجز اور مارکیٹنگ فیس میں کمی سے 1 ارب 80 کروڑ روپے کا فائدہ صارفین کو منتقل کیا جائے گا۔ اسی طرح فکسڈ کاسٹ کی وصولی کی مد میں 17 کروڑ روپے کا اضافی ریلیف بھی شامل ہے۔
یاد رہے کہ رواں مالی سال کی دوسری سہ ماہی میں صارفین کو پہلے ہی 56 ارب 38 کروڑ روپے کا ریلیف دیا جا چکا ہے، جس کے تحت بجلی فی یونٹ 1 روپے 90 پیسے سستی کی گئی تھی۔
اس کے علاوہ مارچ کی فیول پرائس ایڈجسٹمنٹ کی مد میں بھی بجلی 3 پیسے فی یونٹ سستی کرنے کی علیحدہ درخواست نیپرا کو دی گئی ہے، جس پر بھی 29 اپریل کو سماعت متوقع ہے۔
By 
