ٹائمز آف انڈیا کا پاکستان کا اسرائیل کے خلاف ایٹمی حملے سے متعلق دعویٰ جھوٹا نکلا

ویب ڈیسک۔ بھارتی نشریاتی ادارے ٹائمز آف انڈیا کی ایک حالیہ رپورٹ میں دعویٰ کیا گیا ہے کہ ایران کی اسلامی انقلابی گارڈ کور (IRGC) کے سابق سینئر جنرل اور ایرانی قومی سلامتی کونسل کے رکن محسن رضائی نےایرانی سرکاری ٹیلی ویژن کو دیے گئے انٹرویو میں کہا ہے کہ پاکستان نے ایران کو یقین دہانی کرائی ہے کہ اگر اسرائیل نے ایٹمی ہتھیار استعمال کیے تو پاکستان بھی اسرائیل پر جوابی ایٹمی حملہ کرے گا۔

ٹائمز آف انڈیا کے مطابق، محسن رضائی نے مبینہ طور پر کہا کہ پاکستان نے ہمیں بتایا ہے کہ اگر اسرائیل ایٹمی میزائل استعمال کرے گا تو ہم بھی اس پر ایٹمی حملہ کریں گے۔

رپورٹ میں مزید دعویٰ کیا گیا ہے کہ پاکستان کی شاہین-III بیلسٹک میزائل، جس کی رینج 2,700 کلومیٹر ہے، اسرائیل کے کسی بھی علاقے کو نشانہ بنانے کی صلاحیت رکھتی ہے، اور یہ میزائل اس وقت پاکستان کے اسٹریٹجک کمانڈ کے تحت فعال تصور کیا جا رہا ہے۔

یہ بھی پڑھیں: امریکی حملے کا بھرپور جواب دیا جائے گا، وقت اور نوعیت کا تعین افواج کرینگی، ایران

🚨 Azaad Fact Check has detected fake news being spread by Indian news outlets, Times of India, in which The Times of India is quoting former Islamic Revolution Guard Corps (IRGC) chief Major General Mohsen Rezaei as a source of news which claims Pakistan will attack Israel with… pic.twitter.com/etX5S6Q7kJ

— Azaad Fact Check (@azaadfactcheck) June 23, 2025

آزاد فیکٹ چیک کی تحقیق میں بھارتی میڈیا کا دعویٰ غلط قرار

اس خبر کے بعد آزاد فیکٹ چیک نے اس بیان کی حقیقت جاننے کے لیے ایرانی سرکاری ذرائع اور پریس ٹی وی کی اصل رپورٹ کا جائزہ لیا۔ تحقیق کے دوران یہ بات سامنے آئی کہ محسن رضائی نے اپنے انٹرویو میں کہیں بھی پاکستان، اسرائیل، یا کسی ایٹمی حملے کی بات نہیں کی۔

پریس ٹی وی کے مطابق، محسن رضائی نے اتوار کے روز ایرانی ریڈیو اور ٹیلی ویژن کو دیے گئے انٹرویو میں کہا کہ فی الحال کچھ لوگ چاہتے ہیں کہ ہم زیادہ شدت سے کارروائی کریں، لیکن اہم بات یہ ہے کہ جنگ کو منظم انداز سے آگے بڑھایا جائے۔ خوش قسمتی سے، یہ جنگ دانشمندی سے چلائی جا رہی ہے اور سب اسے سمجھداری سے سنبھال رہے ہیں، تاکہ ایرانی قوم کو فیصلہ کن فتح حاصل ہو۔

یہ بھی پڑھیں: مودی کا دوغلا پن: ایرانی صدر کو فون ،حملوں کی مذمت سے گریز، امریکہ کا نام تک نہ لیا

یہ بیان صرف ایران کی اسرائیل کے خلاف فوجی کارروائیوں سے متعلق تھا، اور اس میں پاکستان یا کسی تیسرے ملک کی شمولیت یا ایٹمی حملے کا کوئی ذکر موجود نہیں تھا۔

آزاد فیکٹ چیک نے اپنی تحقیق میں ٹائمز آف انڈیا کے دعوے کو جھوٹا، گمراہ کن اور فیک نیوز قرار دیا ہے۔ تجزیہ نگاروں کے مطابق، اس قسم کی غلط رپورٹس خطے میں بلاوجہ کشیدگی پیدا کرنے کی کوشش ہوتی ہیں، جن سے بین الاقوامی تعلقات پر منفی اثر پڑ سکتا ہے۔