بھارت نے پانی کو ہتھیار بنایا ، بڑے پیمانے پر تباہی ہوئی ہے، احسن اقبال

وفاقی وزیر منصوبہ بندی احسن اقبال نے کہا ہے کہ بھارت نے پانی کو ہتھیار بنایا ہے، بڑے پیمانے پر تباہی ہوئی ہے۔

سیلاب سے متاثرہ علاقوں کے دورے کے دوران میڈیا سے گفتگو کرتے ہوئے انہوں نے کہا کہ بھارت نے آبی جارحیت کی ہے، اگر بھارت سندھ طاس معاہدے کے مطابق پاکستان کے ساتھ ورکنگ انفارمیشن رکھتا تو کم نقصان ہوتا۔

یہ بھی پڑھیں : پنجاب کے دریاؤں میں 38 سال بعد اتنا پانی آیا، آج شاہدرہ سے بڑا ریلہ گزرے گا، عرفان کاٹھیا

احسن اقبال کا کہنا تھا کہ لگتا ہے بھارت پانی جمع کر کے پاکستان کی طرف بھیج رہا ہے، تاکہ پاکستان کا زیادہ سے زیادہ نقصان ہو، وزیراعظم شہباز شریف کا کل نارووال کا دورہ متوقع ہے۔

انہوں نے کہا کہ وزیراعظم شہباز شریف سیلاب کی صورت حال کا جائزہ لیں گے، نارووال تاریخ کے بدترین سیلاب کا سامنا کر رہا ہے، پانی کا اسکیل بہت زیادہ ہے۔ 6 سے 8 فٹ پانی باہر روڈ پر جمع ہو چکا ہے۔

ان کا کہنا تھا کہ ہزاروں ایکڑ فصل تباہ ہو چکی ہے، اربوں روپے کا نقصان ہو چکا ہے، ہم سب کو مل کر سیاست سے بالا تر ہو کر کام کرنا ہوگا، یہ وہ آفت ہے جسے موسمیاتی تبدیلی کہتے ہیں، یہ وہ نئی آفت ہے جس کا مقابلہ کرنے کے لیے ہمیں صف بندی کرنی ہے۔

یہ بھی پڑھیں : مون سون کا آخری سپیل ، وفاقی وزیر مصدق ملک نے خبردار کردیا

واضح رہے کہ بھارت کی جانب سے دریاؤں میں پانی چھوڑنے اور مسلسل بارشوں کے بعد پنجاب کے بڑے دریاؤں میں پانی کی سطح بلند ہو کر خطرناک حد کے قریب پہنچ گئی، بھارتی ہائی کمیشن کی جانب سے پاکستان کو سیلاب سے متعلق فراہم کی گئی نئی معلومات کی بنا پر انڈس واٹر کمیشن نے دریائے چناب اور راوی کے مختلف مقامات پر فلڈ الرٹ جاری کر دیئے۔