ایشیا کپ: پاک بھارت ٹاکرے سے قبل دبئی پولیس کی سخت ہدایات جاری، سیکیورٹی ہائی الرٹ

ایشیا کپ 2025 کے ہائی وولٹیج مقابلے سے قبل دبئی پولیس نے کرکٹ شائقین کے لیے نئی سکیورٹی ایڈوائزری جاری کی ہے۔ حکام نے زور دیا ہے کہ تماشائیوں کا رویہ ایسا ہونا چاہیے جو متحدہ عرب امارات کی دنیا بھر میں کھیلوں کی شاندار میزبانی کی شہرت کے عین مطابق ہو۔

کل دبئی انٹرنیشنل کرکٹ اسٹیڈیم میں پاکستان اور بھارت کا ہائی وولٹیج ٹاکرا ہونے جا رہا ہے، جس کے پیشِ نظر دبئی پولیس نے شائقین کے لیے خصوصی قواعد وضوابط طے کیے ہیں۔

دبئی پولیس کے اسسٹنٹ کمانڈر انچیف برائے آپریشنز اور ای ایس سی کے چیئرمین میجر جنرل سیف محیر المزروعی نے بتایا کہ ایشیا کپ 2025 کے تمام میچوں کے لیے خصوصی پولیس یونٹس تشکیل دیے گئے ہیں۔ انہوں نے خبردار کیا کہ کسی بھی قسم کے ہنگامے یا سکیورٹی میں خلل ڈالنے کی صورت میں سخت کارروائی ہوگی اور شائقین و اسٹیڈیم کے تحفظ کے لیے قانونی اقدامات کیے جائیں گے۔

یہ بھی پڑھیں: ایشیا کپ شروع، پاکستان بھارت کتنی بار ٹکرائیں گے؟، کون سی ٹیم کب اور کس سے کھیلے گی، مکمل شیڈول جاری

سخت سزائیں اور جرمانے

میجر جنرل المزروعی کے مطابق قوانین کی خلاف ورزی کرنے والوں کو سخت سزاؤں کا سامنا کرنا پڑے گا۔

بغیر اجازت پچ میں داخل ہونا یا ممنوعہ اشیاء (جیسے آتشبازی) لانے پر تین ماہ تک قید اور 5,000 سے 30,000 درہم تک جرمانہ ہوگا۔

لڑائی جھگڑا، چیزیں پھینکنا یا نسلی و توہین آمیز زبان استعمال کرنے پر 10,000 سے 30,000 درہم جرمانہ اور قید کی سزا دی جا سکتی ہے۔

ممنوعہ اشیاء

اسٹیڈیم میں درج ذیل اشیاء لانے پر مکمل پابندی ہوگی: آتشبازی، آتش گیر مادہ، لیزر، چھتریاں، بڑے کیمرے، سیلفی اسٹکس، نوکیلی یا زہریلی اشیاء، جھنڈے، بینرز، پالتو جانور، ریموٹ کنٹرول ڈیوائسز، سائیکل، اسکوٹرز اور اسکیٹ بورڈز۔

میجر جنرل المزروعی نے واضح کیا کہ یہ پابندیاں صرف شائقین کے لیے نہیں بلکہ کھلاڑیوں، آفیشلز اور تمام شرکاء کے تحفظ کو یقینی بنانے کے لیے لگائی گئی ہیں۔