آئندہ سکور 0-6 سے بہتر، بھارت  اپنے ’طیاروں کے ملبے میں دفن‘ ہوگا : خواجہ آصف

وزیر دفاع خواجہ محمد آصف نےبھارتی سیاسی و عسکری قیادت کے اشتعال انگیز بیانات پر ردعمل میں رواں برس مئی کی جنگ کا حوالہ دیتے ہوئے کہا ہے کہ اگر دوبارہ جارحیت کی کوشش کی گئی تو سکور 0-6 کی بجائے پہلے سے کہیں بہتر ہو گا اور بھارت ’اپنے طیاروں کے ملبے میں دفن ہوگا۔‘

وزیردفاع خواجہ آصف نے سوشل میڈیا  پر جاری بیان میں  کہا کہ بھارتی فوجی اور سیاسی قیادت کے بیانات اپنی خاک میں ملی ساکھ کو بحال کرنے کی ناکام کوشش ہے۔

خواجہ آصف نے کہا کہ اتنی فیصلہ کن شکست کے بعد جس کا اسکور 0-6 رہا ہو اگر دوبارہ کوشش کی تو اسکور پہلے سے کہیں بہتر ہوگا، جس طرح بھارت میں عوامی رائے تاریخ کی بدترین شکست کے بعد حکومت کے خلاف ہوئی اور مودی اور اس کا ٹولہ جس طرح اپنی ساکھ کھو بیٹھا، اس کا پریشر لیڈر شپ کے بیانات سے ظاہر ہو رہا ہے۔

بھارتی فوجی اور سیاسی قیادت کے بیانات اپنی خاک میں ملی ساکھ کو بحال کرنے کی ناکام کوشش ھے۔ اتنی فیصلہ کن شکست کے بعد جس کا سکور 0-6 رہا ھو اگر دوبارہ کوشش کی تو سکور انشاءاللہ پہلے سے کہیں بہتر ھوگا۔ جسطرح بھارت میں عوامی رائے تاریخ کی بد ترین شکست کے بعد حکومت کے خلاف ھوئ اور…

— Khawaja M. Asif (@KhawajaMAsif) October 4, 2025

خواجہ آصف نے کہا کہ پاکستان اللہ کے نام پہ بنی ریاست ہے، ہمارے محافظ اللہ کے سپاہی ہیں، اس دفعہ بھارت ان شاءاللہ اپنے طیاروں کے ملبے میں دفن ہوگا، اللہ اکبر۔

یہ بھی پڑھیں :پاکستان نے بھارت کے پانچ جنگی طیارے مار گرائے تھے ، امریکی صدر ٹرمپ

قبل ازیں  ترجمان پاک فوج نے بھی بھارت کی اعلیٰ سکیورٹی اسٹیبلشمنٹ کے اشتعال انگیز بیانات پر ردعمل دیا تھا۔

ترجمان پاک فوج کا کہنا تھا  کہ بھارتی سکیورٹی اداروں کے جارحانہ اور اشتعال انگیز بیانات انتہائی تشویش کے ساتھ نوٹ کیے ہیں ، یہ غیر ذمہ درانہ بیانات جارحیت کے لیے من گھڑت بہانوں کی نئی کوشش ہے ، ایسے بیانات سے جنوبی ایشیا میں امن کو سنگین خدشات لاحق ہوسکتے ہیں۔

یاد رہے کہ  بھارتی فضائیہ کے سربراہ امر پریت سنگھ نے جمعے کو دعویٰ کیا تھا کہ مئی میں دونوں ملکوں کے درمیان شدید لڑائی کے دوران انڈیا نے ایف-16 اور جے ایف-17 کلاس کے پانچ پاکستانی لڑاکا طیارے مار گرائے تھے۔

یہ بھی پڑھیں : ڈی جی آئی ایس پی آرکی 50 سینئر ترین صحافیوں سے طویل نشست،غزہ اور کشمیر پر دوٹوک موقف

اسی طرح بھارتی وزیر دفاع راج ناتھ سنگھ نے بھی اس ہفتے کے آغاز میں ایک تقریر میں کہا تھا کہ ’ہمارے سپاہیوں کے پاس ہتھیار بھی ہیں اور بلند حوصلہ بھی۔ کوئی چیلنج ہمارے سامنے ٹھہر نہیں سکتا۔ چاہے وہ دہشت گردی ہو یا کسی اور نوعیت کا مسئلہ، ہم ان سب سے نمٹنے اور انہیں شکست دینے کی پوری صلاحیت رکھتے ہیں۔‘