“ارشد خان چائے والا” کی شہریت سے متعلق عدالت کا بڑا فیصلہ

لاہور ہائیکورٹ راولپنڈی بنچ نے معروف چائے فروش ارشد خان، جنہیں “ارشد خان چائے والا” کے نام سے شہرت حاصل ہوئی، کا شناختی کارڈ بحال کرنے کا حکم دے دیا ہے۔ عدالتی حکم کے بعد نادرا نے فوری طور پر ارشد خان کا قومی شناختی کارڈ دوبارہ فعال کر دیا۔

میڈیا رپورٹس کے مطابق نادرا ویریفکیشن بورڈ نے تفصیلی جانچ پڑتال کے بعد ارشد خان اور ان کے خاندان کی شہریت کی تصدیق کر دی ہے۔ تصدیق کے عمل کے مکمل ہونے کے بعد نادرا نے عدالت کو آگاہ کیا کہ ارشد خان پاکستانی شہری ہیں اور ان کا شناختی کارڈ بحال کر دیا گیا ہے۔

وکیل عمر اعجاز گیلانی، جو ارشد خان کے وکیل کے طور پر عدالت میں پیش ہوئے، نے عدالت کو بتایا کہ ان کے موکل کا مسئلہ اب مکمل طور پر حل ہو گیا ہے۔ ان کا کہنا تھا کہ عدالت کے حکم اور نادرا کی کارروائی کے بعد اب ارشد خان اور ان کے خاندان کی پاکستانی شہریت پر کوئی شبہ باقی نہیں رہا۔

وکیل نے عدالت کو مزید بتایا کہ ان کے موکل اور ان کے اہل خانہ باقاعدہ پاکستانی شہری ہیں اور ان کے تمام کاغذات اور دستاویزات مکمل طور پر درست اور قانونی طور پر تصدیق شدہ ہیں۔

یہ بھی پڑھیں: نئے دفاتر، سینکڑوں نوکریاں ! نادرا کا بڑا فیصلہ سامنے آ گیا

واضح رہے کہ ارشد خان، جنہیں سوشل میڈیا پر ایک تصویر کے ذریعے غیر معمولی شہرت حاصل ہوئی تھی، کا شناختی کارڈ کچھ عرصہ قبل معطل کر دیا گیا تھا، جس کے باعث وہ قانونی اور ذاتی مشکلات کا شکار تھے۔ تاہم لاہور ہائیکورٹ راولپنڈی بنچ کے تازہ فیصلے کے بعد ان کی شہریت سے متعلق تمام شکوک دور ہو گئے ہیں، اور اب وہ دوبارہ اپنے شناختی کارڈ کے ذریعے تمام قانونی اور شہری حقوق استعمال کر سکیں گے۔