سیمی کنڈکٹر پروگرام وقت کی اہم ضرورت، نوجوانوں کو مزید آگے لیکر جانا ہے، وزیراعظم

وزیراعظم شہباز شریف نے کہا ہے کہ سیمی کنڈکٹر کا شروع کیا جانے والا منصوبہ انتہائی اہم اور وقت کی ضرورت ہے، نوجوانوں کو مزید آگے لے کر جانا ہے، جو لوگ سیمی کنڈکٹر اور مصنوعی ذہانت کو کنٹرول کریں گے، وہی دنیا کو کنٹرول کریں گے، یہی مستقبل ہے۔

اسلام آباد میں قومی سیمی کنڈکٹر پروگرام ’انسپائر انیشی ایٹیو‘ کے اجرا کی تقریب سے خطاب کرتے ہوئے وزیراعظم نے کہا کہ دنیا میں سیمی کنڈکٹر کے حوالے سے لفظی جنگ چل رہی ہے، پاکستان کو اللہ تعالیٰ نے قدرتی وسائل سے مالا مال کیا ہے، اب اس سے فائدہ اٹھانا ہماری ذمہ داری ہے، اور ہمیں قوم کو اس حوالے سے جواب دینا ہے۔

وزیراعظم نے کہا کہ اس منصوبے کے لیے ساڑھے 4 ارب روپے کی منظوری محض ایک قطرہ ہے، لیکن فنڈنگ مسئلہ نہیں ہے، ہم نے پاکستان اور نوجوانوں کے مستقبل کے لیے مزید پروگرامز بھی شروع کر رکھے ہیں۔

شہباز شریف نے کہا کہ پاکستان ڈیجیٹل اتھارٹی تشکیل دی گئی ہے، فیڈرل بورڈ آف ریونیو (ایف بی آر) کو مکمل ڈیجیٹائز کیا جارہا ہے، ابھی واشنگٹن میں ورلڈ بینک نے ایف بی آر کے حوالے سے کام کو اجاگر کیا تو عالمی رہنماؤں نے اس عمل کی تحسین کی۔

مزید پڑھیں:وزیراعظم یوتھ لون اسکیم 2025: نوجوانوں کے لیے کم شرح سود پر قرض کی سہولت

ان کا کہنا تھا کہ گزشتہ سال رمضان المبارک میں نادار اور مستحق لوگوں کی مالی مدد کے لیے ڈیجیٹل والٹ کے ذریعے 16 ارب روپے تقسیم کیے، آئندہ سال اسے مزید بڑھایا جائے گا، یہ پاکستان کی تاریخ میں پہلا ایسا ٹرائل تھا، یہ وہ ایک وژن ہے جو ہماری حکومت مل کر آگے بڑھا رہی ہے۔

وزیراعظم نے کہا کہ سیمی کنڈکٹر کا شروع کیا جانے والا منصوبہ انتہائی اہمیت کا حامل ہے، جسے بہت پہلے کرلیا جانا چاہیے تھا، نوجوان ہمارا سرمایہ ہیں، انہیں آئی ٹی سمیت سیمی کنڈکٹر کے شعبہ جات میں تربیت دینی ہے اور آگے لے کر چلنا ہے، مجھے ابھی 7 ہزار کا فگر بتایا گیا لیکن ہمیں اسے مزید آگے بڑھانا ہے۔

🚨🚨سیمی کنڈکٹر پروگرام وقت کی اہم ضرورت ہے ، پاکستان کو سیمی کنڈکٹرز کے میدان میں اللہ تعالیٰ نے وسائل سے نوازا ہے، وزیرِ اعظم محمد شہباز شریف کی سیمی کنڈکٹر “انسپائر انیشی ایٹیو” کے اجراء کی تقریب سے خطاب pic.twitter.com/tZnynza00W

— Azaad Urdu (@azaad_urdu) October 21, 2025

انہوں نے کہا کہ میں اس حوالے سے وفاقی وزیر انفارمیشن ٹیکنالوجی شزا فاطمہ، وفاقی وزیر منصوبہ بندی و ترقیات احسن اقبال سمیت ٹیم کے تمام ارکان کا شکریہ ادا کرتا ہوں، جنہوں نے اس اہم ترین ٹاسک کو حاصل کرنے کے لیے دن رات محنت کی ہے۔

آج پاکستان کی تاریخ میں لکھا جانے والا دن ہے ، وفاقی وزیر شزا فاطمہ

اس موقع پروفاقی وزیر انفارمیشن ٹیکنالوجی شزا فاطمہ نے کہا کہ آج پاکستان میں جس موقع پر ہم موجود ہیں، یہ پاکستان کی تاریخ میں لکھا جانے والا دن ہے، آج پہلی بار نیشنل سیمی کنڈکٹر پروگرام کا اجرا کیا جارہا ہے۔

انہوں نے کہا کہ وزیراعظم پاکستان کا ڈیجیٹل پاکستان کا وژن اور اس کے پیچھے ان کی سپورٹ کی بدولت یہ دن دیکھنا ممکن ہوا، جس میں بہت سے لوگوں کی محنت شامل ہے، یہ سنگ بنیاد ہے اس انقلاب کا، جو حکومت ٹیکنالوجی کے ذریعے برپا کرنے جارہی ہے، ہماری ترجیح نوجوانوں کو تربیت دے کر با اختیار بنانا ہے۔

وفاقی وزیر نے کہا کہ سیمی کنڈکٹر پروگرام یہ محض ٹیکنالوجی نہیں، جیسے کہ کہا گیا کہ یہ پاکستان کی خود انحصاری کی بنیاد ہے، اسے ہم کو کرکے رہنا ہے، حالانکہ کہا جاتا ہے کہ یہ بہت لمبا سفر ہے جو نہیں ہوسکے گا، تربیت دینے والے موجود نہیں۔

یہ بھی پڑھیں : وزیراعظم کے ویژن کے تحت نوجوانوں کے لیے ایک اور بڑی خوشخبری

ان کا کہنا تھا کہ فیلڈ مارشل عاصم منیر اور ایس آئی ایف سی کی ٹیموں نے بھی اس پروگرام کو ممکن بنانے کے لیے اپنا کردار ادا کیا، یہ نا ممکن عمل ہم وزیراعظم کی سربراہی میں ممکن بنائیں گے،  گلوبل انڈسٹری میں اس وقت 2030 تک 10 لاکھ لوگوں کی ضرورت ہوگی، 13 کھرب ڈالر کی سیمی کنڈکٹر کی مارکیٹ ہے۔