پنجاب اور سندھ میں شدید دھند کا سلسلہ برقرار : موٹروے کے مختلف سیکشنز بند

پنجاب میں دھند کا راج تاحال برقرار ہے، شدید دھند کے باعث موٹروے کے مختلف سیکشنز کو بند کردیا گیا۔

سینٹرل ریجن ترجمان کے مطابق موٹروے ایم ٹو لاہور سے کوٹ مومن تک دھند کے باعث بند کر دیا گیا ہے, اوکاڑہ، ساہیوال، کسوال، میاں چنوں،خانیوال، لودھراں اوربہاولپور میں شدید دھند چھائی ہوئی ہے۔

موٹروے ایم تھری فیض پور تارجانہ، ایم فور پنڈی بھٹیاں تا ملتان، ایم فائیو ملتان تا روہڑی تک دھند کی وجہ سے بند کردیا گیا ہے۔

بلوچستان میں بھی قومی شاہراہ پر دھند کے باعث کوئٹہ آنے جانے والی ٹریفک کیلئے بند کر دی گئی۔ موٹروے پولیس نے ڈرائیورز کو گاڑیوں میں فوگ لائٹس استعمال کرنے کی ہدایت کی ہیں۔

اس کے علاوہ احمد پور شرقیہ، ترنڈہ محمد پناہ، اقبال نگر، رحیم یار خان اور صادق آباد، ڈیرہ مراد جمالی منجھو شوریٰ منگولی نوتال میں شدید دھند چھائی ہوئی ہے۔

مزید پڑھیں: امریکا میں خوفناک شدت کا زلزلہ، برفانی پہاڑ بھی لرز اٹھے

ایس ایس پی ہائی وے عبدالعزیز سرپراہ کا کہنا ہے کہ قومی شاہراہ پر دھند کے باعث کوئٹہ آنے جانے والی ٹریفک کیلیے بند کردی گئی ہے، پولیس نے ڈرائیورز کو گاڑیوں میں فوگ لائٹس کااستعمال کرنے کی ہدایت کی ہیں۔

ترجمان نے بتایا کہ موٹرویز کی بندش کا مقصد عوام کی جان و مال کا تحفظ ہے، دھند میں لین کی خلاف ورزی خطرناک حادثات کا باعث ہو سکتی ہے، روڈ یوزرز لین ڈسپلن پر سختی سے عمل کریں، شہری دن کے اوقات میں سفر کو ترجیح دیں، دھند میں صبح 10 تا شام 6 تک محفوظ سفری اوقات ہیں۔

موٹر ویز سینٹرل ریجن ترجمان کا مزید کہنا تھا کہ ڈرائیور حضرات فوگ لائٹس لازمی استعمال کریں، غیر ضروری سفر سے اجتناب کریں، تیز رفتاری نہ کریں، آگے والی گاڑی سے محفوظ فاصلہ رکھیں اور رہنمائی اور مدد کے لیے ہیلپ لائن 130 پر رابطہ کریں۔