پاکستان دفاعی صنعت میں عالمی سطح پر اہمیت حاصل کر رہا ہے، اینڈریاس کریگ، لیکچرار، کنگز کالج لندن

لندن کے کنگز کالج کے سیکیورٹی اسٹڈیز کے لیکچرر اینڈریاس کریگ نے کہا ہے کہ پاکستان دفاع کے شعبے میں ایک درمیانے درجے کا اہم فراہم کنندہ (سپلائر) بن رہا ہے۔

انہوں نے کہا پاکستان فوجی تربیت فراہم کر سکتا ہے، مشاورتی خدمات دے سکتا ہے، مشترکہ مشقیں کر سکتا ہے، بحری آپریشنز میں معاونت فراہم کر سکتا ہے اور کم لاگت والے دفاعی پلیٹ فارمز پیش کر سکتا ہے۔

بین الاقوامی خبر رساں ادارے روئٹرز سے گفتگو کرتے ہوئے کریگ نے کہا کہ یہ امتزاج خاص طور پر کمزور افریقی شراکت داروں کے لیے پرکشش ہے کیونکہ یہ مغربی ممالک کے پروگراموں کے مقابلے میں تیز، کم سیاسی رکاوٹوں والا اور سستا ہے۔ انہوں نے کہا کہ پاکستان کے نجی سیکٹر کی ابھرتی ہوئی دفاعی صنعت، خاص طور پر ڈرون ٹیکنالوجی، کے ساتھ شراکت داری بھی ترقی کی رفتار کو بڑھائے گی۔

راولپنڈی میں واقع ایک ادارے میں ہر سال سیکڑوں کامی کیزی اور نگرانی کے ڈرون تیار کیے جاتے ہیں، جو زیادہ تر فوج کو فراہم کیے جاتے ہیں۔

تجزیہ کاروں کے مطابق ایک اہم چیلنج یہ ہوگا کہ آیا پاکستان جے ایف-17 طیارے کی پیداوار بڑھا سکتا ہے، جو دفاعی صنعت کا بنیادی ستون بن چکا ہے، جبکہ تربیتی طیارے اور ڈرونز کی بھی طلب موجود ہے۔

یہ بھی پڑھیں: عمران خان کے بیٹوں، سونے کے پستول، توشہ خانہ اور لندن مظاہروں پر رضوان رضی کے تہلکہ خیز انکشافات

تجزیہ کار سلیمان نے بین الاقوامی خبر رساں ادارے روئٹرز کو بتایا کہ 2027 کے آخر تک پاکستان کی جے ایف-17 کی پیداوار میں اہم اضافہ، ممکنہ طور پر دوگنا ہوگا، کیونکہ مین فیکٹری میں اپ گریڈز اور توسیعات کی جا رہی ہیں۔

ماہرین نے کہا کہ دفاعی پیداوار بڑھانے میں اہم رکاوٹیں نظر نہیں آتیں اور چین کی حمایت کے ساتھ پاکستان زیادہ تر مشکلات پر قابو پاسکتا ہے۔

اس پیش رفت سے پاکستان کی دفاعی صنعت علاقائی اور عالمی سطح پر مضبوط مقام حاصل کرنے کے قابل ہو جائے گی، اور وہ کم لاگت اور تیز رفتار فوجی خدمات فراہم کرنے والا اہم شراکت دار بنے گا۔