ایک زمانے کی معروف ماڈل سحرش آج کس حال میں ہیں؟

پاکستان کی فیشن انڈسٹری کی معروف سابق ماڈل سحرش کی موجودہ صورتحال نے سوشل میڈیا پر تشویش کی لہر دوڑا دی ہے۔ ایک وقت میں ریمپ پر اپنی خوبصورتی اور کامیاب ماڈلنگ کے باعث شہرت حاصل کرنے والی سحرش آج انتہائی مشکل حالات میں زندگی گزار رہی ہیں۔

میڈیا رپورٹس کے مطابق سحرش 2010 کی دہائی کے آغاز اور وسط میں پاکستان کی نمایاں ماڈلز میں شمار ہوتی تھیں، تاہم نجی زندگی میں پیش آنے والے تلخ واقعات نے ان کی زندگی کا رخ بدل دیا۔

بتایا جاتا ہے کہ ازدواجی زندگی ناکام ہونے کے بعد وہ شدید ذہنی دباؤ کا شکار ہو گئیں، جس کے بعد مبینہ طور پر منشیات کے استعمال میں مبتلا ہوئیں۔ اسی دوران انہوں نے ایک قبل از وقت پیدا ہونے والے بیٹے کو جنم دیا، جسے بعد ازاں ان سے الگ کر دیا گیا۔ میڈیا رپورٹس کے مطابق سحرش کا اپنے بیٹے سے کوئی رابطہ نہیں، جبکہ ان کے سابق شوہر بھی ملاقات کی اجازت نہیں دیتے۔

یہ بھی پڑھیں:ہانیہ عامر کا بیان کیوں تنقید کی زد میں آ گیا؟

رپورٹس میں یہ بھی دعویٰ کیا گیا ہے کہ حالیہ دنوں ایک حادثے کے دوران ان کا پاؤں ٹرین کے نیچے آ گیا، جس کے باعث وہ شدید زخمی ہوئیں اور اب انہیں چلنے پھرنے میں بھی دشواری کا سامنا ہے۔

نجی نیوز پلیٹ فارم کی جانب سے سحرش کی موجودہ زندگی پر مبنی رپورٹ اور ویڈیو منظرِ عام پر آنے کے بعد ان کی حالت سوشل میڈیا پر زیرِ بحث آ گئی۔ ویڈیو دیکھنے کے بعد صارفین نے افسوس اور تشویش کا اظہار کرتے ہوئے ان کی بحالی کے لیے عملی اقدامات کا مطالبہ کیا۔

یہ بھی پڑھیں:صلح نہیں ہوئی، رجب بٹ نے حقیقت سب کے سامنے رکھ دی

متعدد صارفین کا کہنا ہے کہ سحرش کو فوری طور پر بحالی مرکز (ری ہیب) منتقل کیا جانا چاہیے تاکہ وہ منشیات سے نجات حاصل کر سکیں، جبکہ بعض نے اس واقعے کو شوبز انڈسٹری میں ذہنی صحت اور فنکاروں کی فلاح و بہبود سے متعلق ایک اہم مسئلہ قرار دیا۔

سابق ماڈل کی موجودہ صورتحال نے ایک بار پھر ذہنی صحت، منشیات کے استعمال اور شوبز سے وابستہ افراد کی فلاح و بہبود سے متعلق سنجیدہ سوالات کو اجاگر کر دیا ہے۔