چیف الیکشن کمشنر آزاد جموں کشمیر جسٹس (ر) غلام مصطفیٰ مغل نے عوام سے اپیل کی ہے کہ وہ 27 جولائی کو میرپور ڈویژن میں ہونے والے انتخابات میں بھرپور شرکت کریں اور اپنا حقِ رائے دہی ضرور استعمال کریں، ان کا کہنا تھا کہ ووٹ دینا قومی، آئینی اور اسلامی فریضہ ہے۔
ووٹ دینا مذہبی و قومی فریضہ ہے، چیف الیکشن کمشنر
چیف الیکشن کمشنر جسٹس (ر) غلام مصطفیٰ مغل نے کہا کہ ووٹ دینا محض ایک انتخابی عمل نہیں بلکہ ہر شہری پر عائد ایک قومی، آئینی اور اسلامی فریضہ ہے، لہٰذا ہر شہری کو چاہیے کہ وہ اپنا یہ حق ضرور استعمال کرے۔
ان کا کہنا تھا کہ عوام گھروں سے نکل کر اپنی مرضی کے نمائندے کا انتخاب کریں، کیونکہ حقِ رائے دہی کا استعمال ہی مضبوط اور مستحکم جمہوریت کی ضمانت ہے۔
بلاخوف ووٹ ڈالیں، پولنگ اسٹیشنز پر مکمل سیکیورٹی موجود
چیف الیکشن کمشنر نے شہریوں کو یقین دہانی کراتے ہوئے کہا کہ تمام پولنگ اسٹیشنز پر مکمل سکیورٹی انتظامات کیے جا چکے ہیں، لہٰذا شہری بلا خوف و خطر اپنے ووٹ کا حق استعمال کریں۔
انہوں نے بتایا کہ تمام پولنگ اسٹیشنز پر سکیورٹی فورسز اور کوئیک رسپانس فورس تعینات ہوگی، جبکہ ریاست ووٹرز کی پولنگ اسٹیشن آمد و رفت کے دوران بھی سکیورٹی یقینی بنائے گی۔
ان کا کہنا تھا کہ انتخابی عمل میں کسی بھی قسم کی رکاوٹ ڈالنے والے عناصر کے خلاف قانون کے مطابق سخت کارروائی عمل میں لائی جائے گی۔
جمہوری ذمہ داری نبھائیں، مسائل کے حل کے لیے بہتر نمائندہ چنیں
چیف الیکشن کمشنر نے عوام سے اپیل کی کہ وہ انتخابی عمل میں بھرپور حصہ لے کر اپنی جمہوری ذمہ داری ادا کریں اور اپنے ووٹ کے ذریعے اپنے مسائل کے حل کے لیے بہتر نمائندے کا انتخاب کریں، تاکہ آنے والے دنوں میں عوامی مسائل کے حل کے لیے موزوں قیادت سامنے آ سکے۔
انتخابات تین مراحل میں کیوں؟
واضح رہے کہ آزاد جموں کشمیر میں عام انتخابات پہلے ایک ہی روز منعقد کرائے جانے تھے، تاہم سیکیورٹی فورسز کی دستیابی کو مدنظر رکھتے ہوئے چیف الیکشن کمشنر نے انتخابی شیڈول میں ترمیم کرتے ہوئے انتخابات کو 3 مراحل میں تقسیم کر دیا۔ اس فیصلے کا اعلان مظفرآباد میں پریس کانفرنس کے دوران کیا گیا تھا۔
اعلان کردہ شیڈول کے مطابق پہلے مرحلے میں 27 جولائی کو میرپور ڈویژن کے 3 اضلاع میرپور، بھمبر اور کوٹلی کے 13 انتخابی حلقوں میں پولنگ ہوگی۔
دوسرے مرحلے میں 2 اگست کو مظفرآباد ڈویژن میں ووٹنگ کرائی جائے گی، جہاں مہاجرین کی 12 نشستوں پر بھی اسی روز انتخابات ہوں گے۔
جبکہ تیسرے اور آخری مرحلے کے انتخابات 10 اگست کو پونچھ ڈویژن میں منعقد کیے جائیں گے۔ مظفرآباد ڈویژن اور مہاجرین کی مجموعی نشستوں کی تعداد 21 جبکہ پونچھ ڈویژن میں کل نشستوں کی تعداد 11 ہے۔
انتخابات کے نتائج بھی روایتی انداز کے بجائے مرحلہ وار جاری کیے جائیں گے
چیف الیکشن کمشنر نے واضح کیا کہ انتخابات کے نتائج بھی روایتی انداز کے بجائے مرحلہ وار جاری کیے جائیں گے، یعنی جس روز پولنگ ہوگی اسی شام نتیجے کا اعلان بھی کر دیا جائے گا۔
ان کا کہنا تھا کہ انتخابی شیڈول میں یہ ترمیم انتظامی امور کو مؤثر بنانے اور شفاف، منظم و پرامن پولنگ کو یقینی بنانے کے لیے کی گئی ہے۔
میرپور ڈویژن میں ہونے والے پہلے مرحلے کے انتخابات میں مجموعی طور پر 33 لاکھ 65 ہزار 839 رجسٹرڈ ووٹرز اپنا حقِ رائے دہی استعمال کریں گے، جن میں 17 لاکھ 53 ہزار 933 مرد اور 16 لاکھ 11 ہزار 906 خواتین ووٹرز شامل ہیں۔
اسی سلسلے میں 27 جولائی کو آزاد جموں کشمیر میں عام تعطیل کا بھی اعلان کیا جا چکا ہے۔ اس کے علاوہ کمشنر میرپور ڈویژن اور متعلقہ سیکیورٹی حکام نے بھی چیف الیکشن کمشنر کو انتخابات کے لیے سکیورٹی پلان اور انتظامی و لاجسٹک انتظامات سے متعلق بریفنگ دی ہے۔
آزاد جموں کشمیر میں انتخابات کو 3 مراحل میں تقسیم کرنے کا فیصلہ الیکشن کمیشن کی جانب سے سیکیورٹی صورتحال اور وسائل کی محدود دستیابی کے پیش نظر ایک محتاط اور دانشمندانہ حکمتِ عملی دکھائی دیتا ہے۔
پرامن اور شفاف انتخابی عمل
فوج کی نگرانی میں مرحلہ وار پولنگ کرانے سے سیکیورٹی فورسز کو ہر ڈویژن میں مؤثر طور پر تعینات کرنا ممکن ہو سکے گا، جس سے پرامن اور شفاف انتخابی عمل کے امکانات بڑھ جاتے ہیں۔
چیف الیکشن کمشنر کی جانب سے ووٹ کو مذہبی و آئینی فریضہ قرار دے کر عوام سے شرکت کی اپیل دراصل ٹرن آؤٹ بڑھانے کی ایک مؤثر کوشش ہے، کیونکہ کسی بھی انتخابی عمل کی کامیابی کا انحصار عوام کی بھرپور شرکت پر ہوتا ہے۔
سیکیورٹی انتظامات کی یقین دہانی، خاص طور پر پولنگ اسٹیشنز پر کوئیک رسپانس فورس کی تعیناتی، ووٹرز کے اعتماد میں اضافے کا باعث بن سکتی ہے، جو کم ٹرن آؤٹ جیسے خدشات کو کم کرنے میں مددگار ثابت ہو سکتی ہے۔
