ملتان، لودھراں، گوجرانوالہ، بہاولپور اور وہاڑی کے شہریوں نے نئے صوبوں کا مطالبہ کردیا

ملک میں نئے صوبوں کے قیام کا مطالبہ زور پکڑنے لگا، پنجاب کے مختلف شہروں کے شہریوں نے نئے صوبوں کی حمایت کرتے ہوئے کہا ہے کہ انتظامی بنیادوں پر مزید صوبے قائم کیے جائیں تاکہ عوامی مسائل مقامی سطح پر حل ہوسکیں، گورننس میں بہتری آئے اور عوام و حکومت کے درمیان فاصلے کم ہوں۔

آزاد ڈیجیٹل سے گفتگو کرتے ہوئے وہاڑی کے شہریوں نے نئے صوبوں کے قیام کی حمایت کرتے ہوئے کہا کہ سندھ اور پنجاب میں نئے صوبے بننے چاہئیں تاکہ انتظامی امور بہتر انداز میں چلائے جاسکیں اور عوام کو سرکاری سہولیات کے حصول میں آسانی ہو۔

شہریوں کا کہنا تھا کہ موجودہ بڑے صوبوں میں دور دراز علاقوں کے عوام کو اپنے مسائل کے حل کے لیے طویل فاصلے طے کرنا پڑتے ہیں، جس کی وجہ سے نہ صرف وقت ضائع ہوتا ہے بلکہ کئی مسائل بھی بروقت حل نہیں ہو پاتے۔

عوام اور حکومت میں فاصلہ کم ہو

آزاد ڈیجیٹل سے گفتگو میں شہریوں کا کہنا تھا کہ نئے صوبوں کے قیام سے حکومت اور عوام کے درمیان انتظامی فاصلے کم کیے جاسکتے ہیں، مقامی سطح پر اختیارات اور وسائل کی دستیابی سے شہریوں کو اپنے علاقوں میں ہی بنیادی سہولیات میسر آسکتی ہیں،انہوں نے کہا کہ نئے صوبوں کا مقصد صرف انتظامی نقشہ تبدیل کرنا نہیں ہونا چاہیے بلکہ اختیارات کو نچلی سطح تک منتقل کرکے عام شہری کو حقیقی معنوں میں ریلیف فراہم کرنا ہونا چاہیے۔

یہ بھی پڑھیں :نئے صوبے بننے سے ترقیاتی منصوبوں کا عمل تیز ہوگا،روزگار کے مواقع بڑھیں گے، کوئٹہ کے شہری

ملتان میں نئے صوبوں کی آواز

ملتان کے شہریوں نے بھی نئے صوبوں کے قیام کی حمایت کرتے ہوئے کہا کہ جنوبی پنجاب کے عوام طویل عرصے سے انتظامی اختیارات کی نچلی سطح تک منتقلی اور اپنے علاقے کے مسائل کے مقامی سطح پر حل کا مطالبہ کرتے آرہے ہیں،شہریوں کا کہنا تھا کہ جنوبی پنجاب کو انتظامی طور پر مضبوط بنانے سے تعلیم، صحت، زراعت، روزگار، انفراسٹرکچر اور دیگر شعبوں میں ترقیاتی منصوبوں کی رفتار تیز کی جاسکتی ہے۔

لودھراں میں بھی مطالبہ زور پکڑ گیا

لودھراں کے شہریوں نے آزاد ڈیجیٹل سے گفتگو میں مؤقف اختیار کیا کہ نئے خودمختار صوبے قائم ہونے چاہئیں تاکہ پسماندہ علاقوں کو ان کے وسائل اور ضروریات کے مطابق ترقی کے مواقع مل سکیں،شہریوں کے مطابق بڑے صوبوں میں بعض علاقوں کی آواز فیصلہ سازی کے مراکز تک مؤثر انداز میں نہیں پہنچ پاتی، اس لیے انتظامی یونٹس کو چھوٹا اور عوام کے قریب کرنا وقت کی ضرورت ہے۔

گوجرانوالہ کے شہریوں کی حمایت

گوجرانوالہ کے شہریوں نے بھی ملک میں نئے صوبوں کے قیام کی حمایت کی، ان کا کہنا تھا کہ زیادہ انتظامی یونٹس بننے سے زیادہ شہریوں کو براہ راست فائدہ پہنچ سکتا ہے اور سرکاری اداروں تک رسائی آسان ہوسکتی ہے،شہریوں نے مطالبہ کیا کہ ملک میں ایسے انتظامی یونٹس قائم کیے جائیں جو آبادی، رقبے اور انتظامی ضروریات کے اعتبار سے قابل انتظام ہوں تاکہ ترقیاتی وسائل بہتر انداز میں استعمال کیے جاسکیں۔

بہاولپور میں صوبے کی بحالی کا مطالبہ

بہاولپور کے شہریوں اور عمائدین نے نئے صوبوں کے قیام کے ساتھ بہاولپور صوبے کی بحالی کے مطالبے پر بھی زور دیا،ان کا کہنا تھا کہ بہاولپور خطے کے عوام کی اپنی تاریخی اور انتظامی شناخت ہے، اس لیے علاقے کے عوام کے مطالبات کو بھی نئے انتظامی ڈھانچے پر غور کرتے وقت سامنے رکھا جانا چاہیے۔

یہ بھی پڑھیں :ملک میں نظام اب فیل ہو چکاہے، ہم چاہتے ہیں نئے صوبے بنائیں جائیں،مردان کے شہریوں کامطالبہ

وسائل کی منصفانہ تقسیم ضروری

مختلف شہروں کے شہریوں نے کہا کہ نئے صوبوں کے قیام کے ساتھ وسائل کی منصفانہ تقسیم بھی یقینی بنائی جائے،محض نئے صوبے بنانے سے مسائل حل نہیں ہوں گے بلکہ ہر انتظامی یونٹ کو مناسب مالی وسائل اور اختیارات فراہم کرنا بھی ضروری ہوگا،شہریوں کا کہنا تھا کہ اگر مقامی حکومتوں اور انتظامی اداروں کو بااختیار بنایا جائے تو عوام کو صحت، تعلیم، صاف پانی، سڑکوں، روزگار اور دیگر بنیادی سہولیات کی فراہمی بہتر بنائی جاسکتی ہے۔

نئے صوبوں سے ترقی تیز ہوگی

شہریوں کے مطابق چھوٹے انتظامی یونٹس قائم ہونے سے ترقیاتی منصوبوں کی منصوبہ بندی اور تکمیل کا عمل تیز ہوسکتا ہے،مقامی ضروریات کو سامنے رکھ کر منصوبے بنائے جائیں تو وسائل کے ضیاع کو کم اور عوام کو زیادہ فائدہ پہنچایا جاسکتا ہے۔

سیاسی مفادات سے بالاتر فیصلہ ہو

شہریوں نے مطالبہ کیا کہ نئے صوبوں کے قیام کے معاملے کو سیاسی مفادات یا جماعتی اختلافات کے بجائے عوامی ضرورت، انتظامی سہولت، وسائل کی منصفانہ تقسیم اور زمینی حقائق کی بنیاد پر دیکھا جائے،ان کا کہنا تھا کہ پنجاب اور سندھ جیسے بڑے صوبوں میں نئے انتظامی یونٹس کے قیام پر سنجیدہ اور کھلی بحث ہونی چاہیے اور اس حوالے سے عوامی رائے کو بھی اہمیت دی جانی چاہیے۔

حکومت سے سنجیدہ اقدام کا مطالبہ

ملتان، لودھراں، گوجرانوالہ، بہاولپور اور وہاڑی کے شہریوں نے حکومت سے مطالبہ کیا کہ نئے صوبوں کے قیام کے معاملے پر سنجیدگی سے غور کیا جائے اور ایسا انتظامی نظام تشکیل دیا جائے جس میں اختیارات، وسائل اور فیصلہ سازی عوام کے زیادہ سے زیادہ قریب ہو،شہریوں کے مطابق نئے صوبوں کا قیام بہتر گورننس، تیز تر ترقی، وسائل کی منصفانہ تقسیم اور عوامی مسائل کے فوری حل کی جانب اہم قدم ثابت ہوسکتا ہے۔