دہشتگرد تنظیم گل بہادر گروپ نے اہم ترین کمانڈر کی ہلاکت کی تصدیق کردی، ابوذر بنگش عرف زاہد گل کوہاٹ پولیس لائن حملہ کا ماسٹر مائنڈ تھا

خیبر پختونخوا میں سیکیورٹی فورسز کی کامیاب کارروائی کے دوران فتنہ الخوارج کے اہم کمانڈر اور کوہاٹ پولیس لائن حملے کے ماسٹر مائنڈ ابوذر بنگش عرف زاہد گل کو ہلاک کر دیا گیا ہے، جس کی دہشتگرد تنظیم نے خود بھی تصدیق کر دی ہے۔

دہشتگرد تنظیم ‘گل بہادر گروپ’ (نام نہاد اتحاد المجاہدین پاکستان) نے اپنے ایک اہم ترین کمانڈر کی ہلاکت کی باقاعدہ تصدیق کر دی ہے۔

ہلاک ہونے والے دہشتگرد کی شناخت ابوذر بنگش عرف زاہد گل کے نام سے ہوئی ہے، جو کہ سیکیورٹی فورسز اور قانون نافذ کرنے والے اداروں کو انتہائی مطلوب تھا۔

یہ بھی پڑھیں:دالبندین میں سیکیورٹی فورسز کا انٹیلی جنس بیسڈ آپریشن، کوئٹہ تفتان شاہراہ پر دہشت پھیلانے والے 2 مطلوب دہشتگرد ہلاک

یہ دہشتگرد نہ صرف سیکیورٹی فورسز کے خلاف متعدد کارروائیوں میں ملوث تھا بلکہ یہ ہولناک ’کوہاٹ پولیس لائن حملے‘ کا بھی بنیادی ماسٹر مائنڈ تھا۔ اس کمانڈر کی ہلاکت کو دہشتگرد نیٹ ورک کے لیے ایک بہت بڑا دھچکا قرار دیا جا رہا ہے۔

سیکیورٹی فورسز کی خیبرپختونخوا میں کارروائیاں

 خیبر پختونخوا کے مختلف علاقوں میں سیکیورٹی فورسز کی جانب سے ’فتنہ الخوارج‘ اور ’فتنہ الہندوستان‘کے عناصر کے خلاف بھرپور اور فیصلہ کن کارروائیاں جاری ہیں۔

انٹیلی جنس بیسڈ اور بروقت کارروائیوں کے نتیجے میں سیکیورٹی فورسز کو پے در پے شاندار کامیابیاں مل رہی ہیں۔

کوہاٹ کے علاقے میں کی جانے والی اس کارروائی کو سیکیورٹی حلقوں کی طرف سے ایک انتہائی کامیاب ترین کارروائی قرار دیا جا رہا ہے، جس نے دہشتگردوں کے ناپاک عزائم کو خاک میں ملا دیا ہے۔

عسکری حکمتِ عملی اور امن دشمن نیٹ ورکس

ریاست مخالف عناصر اور بیرونی سرپرستی میں چلنے والے دہشتگرد گروہوں کی جانب سے ملک میں بدامنی پھیلانے کی کوششیں ہمیشہ سے قانون نافذ کرنے والے اداروں کے عزم کے سامنے ناکام ہوتی رہی ہیں۔

مزید پڑھیں:دہشتگردوں کا شکار جاری ، سی ٹی ڈی اور سیکیورٹی فورسز کا کامیاب انٹیلیجنس بیسڈ آپریشن، کوہاٹ پولیس لائنز حملے کا ماسٹر مائنڈ ہلاک

فتنہ الخوارج اور ان کے حامی عناصر ہمیشہ سے معصوم شہریوں اور قانون نافذ کرنے والے اداروں کو نشانہ بناتے آئے ہیں۔

اس طرح کے ماسٹر مائنڈز کے انجام تک پہنچنے سے نہ صرف عسکری نیٹ ورکس کی کمر ٹوٹتی ہے بلکہ دہشتگردی کے مکمل خاتمے کے قومی عزم کو بھی مزید تقویت ملتی ہے۔

ریاستی رٹ کو چیلنج کرنے والے عناصر کے خلاف اس قسم کے آپریشنز اس بات کا غماز ہیں کہ ملک کے چپے چپے سے دہشتگردی کا ناسور جڑ سے اکھاڑ پھینکنے کے لیے سیکیورٹی فورسز ہمہ وقت تیار اور متحرک ہیں۔