راولپنڈی کی سینٹرل جیل اڈیالہ کا قیدی انتقال کرگیا

راولپنڈی کی سینٹرل جیل اڈیالہ کا قیدی انتقال کرگیا۔

جیل انتظامیہ کے مطابق نذیر نام کا قیدی جیل میں اسیری کے دوران بیمار ہو گیا تھا اور اس کی حالت بگڑنے پر اسے ڈسٹرکٹ ہیڈکوارٹرز ہسپتال راولپنڈی منتقل کیا گیا۔ تاہم قیدی دوران علاج ہی دم توڑ گیا۔

قیدی کی موت رات گئے ہوئی لیکن تاحال اس کا پوسٹمارٹم نہیں ہو سکا ہے۔ اس دوران قیدی کے لواحقین میت کے حصول کے لیے پریشان ہیں اور ابھی تک ان کی جانب سے میت کی واپسی کے حوالے سے کوئی فیصلہ نہیں ہوسکا۔

مزید پڑھیں: مذاکرات بارے ہمارا بیانیہ بڑا کلیئر، عمران خان سمیت تمام کارکنان کو رہا کیا جائے، عمر ایوب

دوسری جانب 26 نومبر کے احتجاج کے حوالے سے درج مقدمات میں اہم پیشرفت سامنے آئی ہے۔ پی ٹی آئی کے 278 گرفتار ورکرز کی ضمانتیں منظور کرتے ہوئے اسلام آباد کی انسداد دہشت گردی عدالت نے انہیں رہا کرنے کا حکم دے دیا۔

تفصیلات کے مطابق جج ابو الحسنات محمد ذوالقرنین نے محفوظ فیصلہ سناتے ہوئے ملزمان کو پانچ پانچ ہزار روپے کے مچلکوں کے عوض رہا کرنے کی ہدایت کی ہے۔ مجموعی طور پر 436 ضمانت کی درخواستوں میں سے 158 ورکرز کی ضمانتیں مسترد کردی گئیں۔

ذرائع کے مطابق تھانہ کوہسار کے مقدمے میں 43 ملزمان کی ضمانتیں منظور کی گئیں جبکہ ایک درخواست خارج کردی گئی۔ تھانہ نون کے مقدمے میں 17 ملزمان کی ضمانتیں منظور اور ایک درخواست خارج کی گئی۔ اسی طرح تھانہ آ بپارہ کے مقدمے میں 70 ملزمان کی ضمانتیں منظور کی گئیں جبکہ 25 درخواستیں مسترد کردی گئیں۔