پاک افغان حکام کے درمیان ہونے والی فلیگ میٹنگ کامیاب ہوگئی، جس کے بعد طورخم بارڈر کھولنے کا فیصلہ کیا گیا۔
پچیس دن بعد پاک افغان بارڈر کوباقاعدہ طور پر دو طرفہ تجارت کے لیے کھول دیا گیا ہے، جس کے بعد پاکستان کی جانب سے پہلی تجارتی گاڑی افغانستان روانہ ہو گئی۔
زیرو پوائنٹ پر دونوں ممالک کے جرگہ ممبران کے مابین مختصر ملاقات ہوئی، ملاقات کے بعد مال بردار گاڑیوں نے بارڈر کراس کیا۔ پیدل آمدورفت کے لیے بارڈر کو دو دن بعد کھولا جائے گا۔
بارڈر کھلنے کے فیصلے پر عوام، ٹرانسپورٹرز، ڈرائیورز اور مسافروں نے خوشی کا اظہار کرتے ہوئے دونوں ممالک کے حکام کا شکریہ ادا کیا ہے۔
ان کا کہنا تھا کہ اس اقدام سے تجارتی سرگرمیوں کو فروغ ملے گا اور دونوں ممالک کے درمیان تعلقات مزید مضبوط ہوں گے۔