برطانیہ میں پاکستان کے ہائی کمشنر ڈاکٹر محمد فیصل نے عالمی برادری پر زور دیا ہے کہ وہ پہلگام فالس فلیگ آپریشن کے بعد بھارت کے جارحانہ رویے اور پاکستان مخالف بے بنیاد الزامات کا نوٹس لے۔
برطانیہ میں پاکستانی سفیر ڈاکٹر محمد فیصل نے غیر ملکی میڈیا کو انٹرویو دیتے ہوئے بھارت کے فالس فلیگ آپریشن پر سخت ردعمل ظاہر کرتے ہوئے کہا کہ بھارت کا حالیہ فالس فلیگ آپریشن قابل مذمت ہے، یہ جھوٹ پر مبنی ایک ڈراما تھا جو بھارت نے جان بوجھ کر رچایا ہے۔
ڈاکٹر محمد فیصل نے واضح کیا کہ پاکستان بھارت کی کسی بھی جارحیت کا بھرپور جواب دے گا، بھارت کے الزام تراشیاں صرف جھوٹ پر مبنی ہیں ان کا کوئی ثبوت نہیں ہے، بھارت اگر پہلگام فالس فلیگ آپریشن کے جواب میں کروائی کرے گا تو اسے 2019 کی طرح سخت جواب ملے گا۔
انہوں نے کہا کہ یہ کسی بھی خودمختار ملک کی ذمہ داری ہوتی ہے کہ اپنے دفاع میں کارروائی کرے، کشمیر ایک متنازع علاقہ ہے جس کا اقوام متحدہ کی قراردادوں کے مطابق حل ہونا ضروری ہے۔ بھارت سلامتی کونسل میں کیے گئے اپنے وعدے پورے کرنے سے انکاری ہے۔
ڈاکٹر محمد فیصل نے مزید کہا کہ تنازع کشمیر پر فیصلہ عوام کی رائے سے ہی ہونا چاہیے، ہم جنگ نہیں چاہتے، پرامن حل اور شواہد پر بات چیت کے حامی ہیں، لیکن اگر جارحیت کی گئی تو پاکستان اپنے دفاع میں بھرپور جواب دینے کے لیے تیار ہے۔
By 
