سوئس و اطالوی فٹ بال ایڈمنسٹریٹر اور فیفا کے صدر جیانی انفینٹینو نے کہا ہے کہ وہ جلد پاکستان آئیں گے۔
عرب میڈیا رپورٹ کے مطابق فیفا کے صدر جیانی انفنٹینو نے پاکستان جلد آنے کا اعلان کیا ہے ، ایک انٹرویو میں بولے کہ میں نے وزیر اعظم شہباز شریف سے بھی پاکستان آنے کا وعدہ کیا تھا۔
انہوں نے کہا کہ پاکستان فٹبال فیڈریشن میں نئے صدر آئے ہیں جو زبردست کام کررہے ہیں، پاکستان فٹبال کا ایک عظیم ملک ہے۔
فیفا کے صدر نے مزید کہا کہ ان کی خواہش ہے کہ پاکستان ایشیا کی فٹبال کی ٹیموں میں اپنا ایک مضبوط مقام بنائے اور وہ اس مقصد کے لیے پاکستان فٹبال کے حکام کے ساتھ مل کر کام کررہے ہیں۔
ان کے بقول، ملک میں نوجوان کھلاڑیوں کی صلاحیتوں کو نکھارنے کے لیے مختلف پروگرام اور ٹریننگ سیشنز منعقد کیے جا رہے ہیں تاکہ پاکستان ایشیائی مقابلوں میں بہتر کارکردگی دکھا سکے۔
پاکستان کے فیفا کے ساتھ تعلقات سالوں کے دوران مستحکم اور ترقی پذیر ہوتے جا رہے ہیں ، گزشتہ ماہ فیفا نے پاکستانی رکن پارلیمنٹ سیدہ آمنہ بتول کو اپنی انسٹیٹیوشنل ریفارمز کمیٹی میں مقرر کیا۔
فیفا کے سینئر نائب صدر شیخ سلمان بن ابراہیم الخلیفہ نے بھی نومبر 2025 میں پاکستان کا دورہ کیا ، تین روزہ دورے کے دوران انہوں نے پاکستانی فٹ بال ایگزیکٹوز اور حکومتی حکام کے ساتھ فٹ بال کے انفراسٹرکچر کی ترقی پر تبادلہ خیال کیا۔
پاکستان میں نوجوانوں میں فٹبال طویل عرصے سے مقبول رہا ہے، لیکن حالیہ برسوں میں بین الاقوامی لیگز میں بڑھتی دلچسپی کے باعث گراس روٹس سطح پر اس کھیل میں حصہ لینے والے نوجوانوں کی تعداد میں اضافہ ہوا ہے۔
اہم شہروں میں مقامی ٹورنامنٹس، اسکول مقابلے، اور کمیونٹی کلبز نے اس کھیل کے شوق کو مزید بڑھایا ہے تاہم دیگر کھیلوں کی طرح یہ بھی کرکٹ کے سائے میں موجود ہے، کئی دہائیوں سے کرکٹ پاکستان میں سب سے زیادہ مقبول اور منافع بخش کھیل بنی ہوئی ہے۔
By 
