ڈی جی امیگریشن اینڈ پاسپورٹس نے نادرا کے تعاون سے پاسپورٹ درخواست گزاروں کے لیے اہم اور جدید سہولت متعارف کرائی ہے، جس کے تحت اب فنگر پرنٹس ویریفیکیشن “پاک آئی ڈی” موبائل ایپ کے ذریعے کی جائے گی۔
اس نئی سہولت کے آغاز کا مقصد آن لائن پاسپورٹ کے لیے درخواست دینے والے شہریوں کو فنگر پرنٹس کی تصدیق کے مرحلے میں درپیش مشکلات کو کم کرنا اور پورے عمل کو زیادہ آسان، موثر اور قابلِ رسائی بنانا ہے۔
محکمہ پاسپورٹس اینڈ امیگریشن کے مطابق آن لائن پاسپورٹ درخواستوں کے دوران فنگر پرنٹس ویریفیکیشن ایک طویل عرصے سے شہریوں کے لیے مشکل مرحلہ سمجھا جاتا تھا، کیونکہ اس عمل کے لیے اکثر بائیومیٹرک مشین یا مخصوص سینٹرز پر جانا پڑتا تھا۔ تاہم نادرا کے تعاون سے اب یہ تصدیقی عمل براہِ راست پاک آئی ڈی ایپ کے ذریعے کیا جا سکے گا، جو درخواست گزاروں کے لیے نہ صرف وقت کی بچت کا باعث بنے گا بلکہ انہیں ایک آسان، محفوظ اور گھر بیٹھے مکمل ہونے والا طریقہ فراہم کرے گا۔
نئے نظام کے تحت شہری اپنے اسمارٹ فون کی مدد سے ایپ کے اندر فنگر پرنٹس سکین کر کے انہیں پاسپورٹ درخواست کے ساتھ لنک کر سکیں گے۔ اس ڈیجیٹل طریقہ کار سے نہ صرف ملک کے اندر رہنے والے افراد کو سہولت میسر آئے گی بلکہ بیرونِ ملک موجود پاکستانیوں کے لیے بھی یہ ایک قابلِ قدر سہولت ثابت ہو گی، کیونکہ وہ بغیر کسی اضافی انتظام کے فنگر پرنٹس کی تصدیق کر سکیں گے۔
واضح رہے کہ اب شہری پاسپورٹ کے لیے آن لائن درخواست بھی جمع کرا سکتے ہیں، اور اس نئی فنگر پرنٹس ویریفیکیشن سہولت کے بعد آن لائن درخواست کا پورا عمل پہلے سے کہیں زیادہ آسان ہو گیا ہے۔ محکمہ امیگریشن اینڈ پاسپورٹس کے مطابق اس نظام کی بدولت شہریوں کا قیمتی وقت بچے گا، لائنوں میں لگنے کی ضرورت کم ہو جائے گی اور پاسپورٹ فارم جمع کرانے کے عمل میں شفافیت اور رفتار میں بھی اضافہ ہوگا۔
اس پیش رفت کو ملک میں ڈیجیٹل سہولیات کے فروغ کی جانب ایک اہم قدم قرار دیا جا رہا ہے، جبکہ حکام کا کہنا ہے کہ آنے والے دنوں میں آن لائن پاسپورٹ سروس کو مزید جدید اور آسان بنانے کے لیے مزید اقدامات بھی کیے جائیں گے۔
By 
