معرکۂ حق کی کامیابی کا ایک سال مکمل، ڈاؤ یونیورسٹی میں پاک افواج سے اظہارِ یکجہتی کے لیے بڑی ریلیاں

معرکۂ حق اور آپریشن بنیان المرصوص کی کامیابی کا ایک سال مکمل ہونے پر ڈاؤ یونیورسٹی آف ہیلتھ سائنسز کے اوجھا کیمپس اور ڈاؤ میڈیکل کالج میں پاک افواج کے ساتھ والہانہ محبت اور یکجہتی کے اظہار کے لیے بڑی ریلیاں نکالی گئیں۔

اوجھا کیمپس میں مرکزی ریلی کی قیادت وائس چانسلر پروفیسر ڈاکٹر نازلی حسین نے کی، جبکہ اس موقع پر اساتذہ، ڈاکٹرز، طلبہ، پیرا میڈیکل اسٹاف اور غیر تدریسی عملے کی بڑی تعداد شریک ہوئی۔

ریلی کے شرکاء نے ہاتھوں میں قومی پرچم اور مختلف پلے کارڈز اٹھا رکھے تھے جن پر پاک فوج کے حق میں نعرے درج تھے۔ ریلی کے دوران ’ پاک فوج زندہ باد‘ اور ’پاکستان پائندہ باد‘ کے نعروں سے فضا گونجتی رہی۔

اس موقع پر خطاب کرتے ہوئے وائس چانسلر پروفیسر ڈاکٹر نازلی حسین نے کہا کہ “معرکۂ حق کی کامیابی پاکستان کی تاریخ کا ایک سنہری باب ہے جس نے ملک کے دفاع کو ناقابلِ تسخیر بنا دیا ہے۔”

یہ بھی پڑھیں: معرکہ حق کی سالگرہ ،لبرٹی چوک پر جشن ،فیلڈ مارشل،پاک فوج، پاک فضائیہ اور پاک بحریہ کو خراج تحسین

انہوں نے مزید کہا کہ پوری قوم اور تعلیمی ادارے اپنی مسلح افواج کے شانہ بشانہ کھڑے ہیں اور ان کی قربانیوں کو قدر کی نگاہ سے دیکھتے ہیں۔

ریلیوں کے اختتام پر پاکستان کی سلامتی، استحکام اور ملک کی معاشی و سماجی ترقی کے لیے خصوصی دعائیں کی گئیں۔