پٹرولیم کی قیمتوں میں بڑے اضافے کا امکان، سمری وزیر اعظم کے پاس پہنچ گئی

پٹرولیم مصنوعات کی قیمتوں میں رد و بدل کے لیے آئل اینڈ گیس ریگولیٹری اتھارٹی (اوگرا) کی جانب سے تیار کردہ سفارشات پر مشتمل سمری وزارتِ خزانہ کے ذریعے وزیرِ اعظم آفس پہنچ گئی ہے جس کے تحت بعض پٹرولیم مصنوعات کی قیمتوں میں اضافے کی سفارش کی گئی ہے۔

اوگرا کی سمری میں گزشتہ ماہ کی پٹرولیم مصنوعات کی درآمدی لاگت کو بنیاد بنا کر قیمتوں کے تعین کی تجویز دی گئی ہے، جس کے مطابق ہائی اسپیڈ ڈیزل، لائٹ ڈیزل اور مٹی کے تیل کی قیمتوں میں اضافے کی سفارش کی گئی ہے، جبکہ پٹرول کی قیمت میں معمولی کمی تجویز کی گئی ہے۔

یہ بھی پڑھیں:پی ایس او کا بڑا اقدام: پٹرولیم مصنوعات سے متعلق اہم خبر

سمری کے مطابق ہائی اسپیڈ ڈیزل کی قیمت میں 9 روپے 47 پیسے فی لیٹر، لائٹ ڈیزل کی قیمت میں 6 روپے 95 پیسے فی لیٹر جبکہ مٹی کے تیل کی قیمت میں 3 روپے 69 پیسے فی لیٹر اضافے کی سفارش کی گئی ہے۔ اوگرا نے پٹرول کی قیمت میں معمولی کمی کی تجویز بھی دی ہے، تاہم اس کی حتمی مقدار کا فیصلہ وزیرِ اعظم کریں گے۔

ذرائع کے مطابق اوگرا کی جانب سے قیمتوں کی سمری ایک ماہ قبل بین الاقوامی منڈی میں پٹرولیم مصنوعات کی قیمتوں کی بنیاد پر تیار کی جاتی ہے، جس میں ڈیلر مارجن اور حکومتی ٹیکسز شامل کر کے نئی قیمتیں تجویز کی جاتی ہیں۔ درآمدی لاگت میں اضافے یا کمی کا براہِ راست اثر عوام پر پڑتا ہے۔

شیڈول کے مطابق ہر ماہ کی آخری تاریخ کو رات بارہ بجے سے قبل وزیرِ اعظم پٹرولیم مصنوعات کی قیمتوں میں اضافے یا کمی کا حتمی فیصلہ کرتے ہیں، جس کے بعد نئی قیمتوں کا اطلاق ملک بھر میں نافذ کر دیا جاتا ہے۔