چیری گاڑی کی رعایتی آفر ختم، نئی قیمت سامنے آ گئی

چیری ماسٹر پاکستان نے اپنی سات سیٹوں والی پلگ اِن ہائبرڈ گاڑی ٹگو آٹھ کے لیے دی گئی محدود مدت کی تعارفی پیشکش باضابطہ طور پر ختم کر دی ہے، جس کے بعد گاڑی کی قیمت میں اضافہ کر دیا گیا ہے۔

کمپنی کے مطابق ٹگو آٹھ پلگ اِن ہائبرڈ کو لانچ کے موقع پر خصوصی رعایتی قیمت ایک کروڑ نو لاکھ ننانوے ہزار روپے میں پیش کیا گیا تھا۔ یہ رعایت صرف اکتیس جنوری دو ہزار چھبیس تک گاڑی کی پیشگی رجسٹریشن کروانے والے صارفین کے لیے مخصوص تھی، تاہم مقررہ مدت ختم ہونے کے بعد اب نئی قیمت لاگو کر دی گئی ہے۔

یہ بھی پڑھیں:اٹلی کا پاکستانی طلبا کے لیے بڑا اعلان،ہر ماہ نو سو یورو وظیفہ اور یونیورسٹی کی فیس میں مکمل چھوٹ

چیری ماسٹر پاکستان کا کہنا ہے کہ دو فروری دو ہزار چھبیس سے گاڑی کی نئی قیمت ایک کروڑ بارہ لاکھ ننانوے ہزار روپے مقرر کر دی گئی ہے، جس کے تحت گاڑی کی قیمت میں تین لاکھ روپے کا اضافہ ہوا ہے۔

کمپنی نے بتایا کہ تعارفی پیشکش کو صارفین کی جانب سے غیر معمولی اور شاندار ردعمل ملا، جس کے باعث محدود تعداد میں دستیاب یونٹس تیزی سے بک ہو گئے۔ چیری کے مطابق نئی قیمت گاڑیوں کے ایک محدود کوٹے پر لاگو ہو گی، جن کی فراہمی جون دو ہزار چھبیس میں متوقع ہے۔

واضح رہے کہ ٹگو آٹھ پلگ اِن ہائبرڈ پاکستان کی پہلی سات نشستوں والی پلگ اِن ہائبرڈ اسپورٹس یوٹیلٹی گاڑی ہے، جو جدید ٹیکنالوجی، کم ایندھن خرچ کرنے کی صلاحیت اور جدید سہولیات کے باعث گاڑیوں کی مارکیٹ میں خاصی مقبول ہو رہی ہے۔

ماہرین کا کہنا ہے کہ قیمت میں اضافے کے باوجود اس گاڑی کی مانگ برقرار رہنے کا امکان ہے، تاہم تعارفی رعایت کے خاتمے کے بعد خریداروں کو اب اس گاڑی کے لیے زیادہ رقم ادا کرنا پڑے گی۔