رمضان المبارک کے دوران اسکولوں کے اوقاتِ کار کیا ہوں گے؟

پنجاب حکومت نے رمضان المبارک کے دوران صوبے بھر میں اسکولوں کے اوقاتِ کار میں تبدیلی کا اعلان کر دیا ہے۔

اس حوالے سے اسکول ایجوکیشن ڈیپارٹمنٹ کی جانب سے 16 فروری کو جاری کیے گئے نوٹیفکیشن کے مطابق رمضان المبارک میں پنجاب کے تمام تعلیمی ادارے نظرثانی شدہ اوقات کے تحت کام کریں گے۔

نوٹیفکیشن کے مطابق سنگل شفٹ اسکولوں میں پیر سے جمعرات تک کلاسز صبح 8:30 بجے سے دوپہر 1:00 بجے تک ہوں گی، جبکہ جمعہ کے روز اسکول دوپہر 12:30 بجے بند ہوں گے۔

اسی طرح ڈبل شفٹ اسکولوں میں صبح کی شفٹ پیر سے جمعرات تک صبح 8:30 بجے سے دوپہر 12:30 بجے تک ہوگی، جبکہ شام کی شفٹ انہی دنوں میں دوپہر 1:00 بجے سے شام 4:00 بجے تک چلے گی۔ جمعہ کے روز دوسری شفٹ دوپہر 2:30 بجے سے شام 5:00 بجے تک ہوگی۔

یہ بھی پڑھیں: ٹی20 ورلڈ کپ،پاکستان ٹیم نے منفرد بولنگ ریکارڈ قائم کردیا

نوٹیفکیشن میں یہ بھی کہا گیا ہے کہ گرلز اسکولز مذکورہ شیڈول کے مطابق مقررہ وقت سے 15 منٹ پہلے کھلیں گے اور 15 منٹ پہلے بند ہوں گے۔

نوٹیفکیشن کے مطابق یہ نظرثانی شدہ شیڈول رمضان المبارک کے دوران روزہ رکھنے والے طلبہ اور اسٹاف کی سہولت کے لیے نافذ رہے گا۔