’پاکستان کی جانب دیکھنے والی ہر میلی آنکھ مٹا دی جائے گی‘، ایک ایک انچ کا دفاع کریں گے، طارق فضل چوہدری

وفاقی وزیر برائے پارلیمانی امور طارق فضل چوہدری نے افغانستان میں دہشتگردوں کے ٹھکانوں کو نشانہ بنائے جانے کے بعد سخت مؤقف اختیار کرتے ہوئے کہا ہے کہ ’ہر اس میلی آنکھ کو مٹا دیا جائے گا جو پاکستان کی طرف اٹھے گی‘۔ انہوں نے اپنے بیان میں واضح کیا کہ ریاست اپنی خودمختاری اور شہریوں کے تحفظ پر کوئی سمجھوتہ نہیں کرے گی۔

یاد رہے کہ گزشتہ روز بنوں میں ہونے والے دہشتگرد حملے میں پاک فوج کے لیفٹیننٹ کرنل گلفراز اور سپاہی کرامت شہید ہوئے تھے۔ سیکیورٹی ذرائع کے مطابق اس حملے کے تانے بانے بھی دیگر حالیہ کارروائیوں کی طرح افغانستان سے ملے تھے۔ شہداء کی نماز جنازہ پورے فوجی اعزاز کے ساتھ ادا کی گئی جبکہ ملک بھر میں افسوس اور غم کی فضا دیکھی گئی۔

یہ بھی پڑھیں:’اب کوئی رعایت نہیں‘، دہشتگرد جہاں بھی ہوں گے نشانہ بنیں گے، آئی ایس پی آر کا دوٹوک اعلان

وزارت اطلاعات و نشریات کی جانب سے جاری بیان میں کہا گیا کہ حالیہ خودکش حملوں میں افغانستان میں موجود دہشتگرد قیادت اور ان کے سہولت کار ملوث ہیں۔ بیان کے مطابق دہشتگردوں نے حالیہ دنوں میں اسلام آباد کی ایک امام بارگاہ، باجوڑ اور بنوں میں کارروائیاں کیں جن کی ذمہ داری افغانستان میں موجود عناصر نے قبول کی۔

ملک پاکستان کے ایک ایک کونے ایک ایک انچ کی حفاظت کو یقینی بنایا جائے گا ، ہر اس میلی آنکھ کو مٹا دیا جائے گا جو ریاست پاکستان کی طرف اٹھے گی ، افغانستان میں موجود فتنہ الخوارج کے ٹھکانوں کو پاک فضائیہ کے شاہینوں نے کامیابی سے نشانہ بنایا

پاکستان ہمیشہ زندہ باد pic.twitter.com/1urLgsQ4dv

— Dr. Tariq Fazal Ch. (@DrTariqFazal) February 22, 2026

میڈیا رپورٹ کے مطابق رات گئے پاک فضائیہ کے شاہینوں نے افغانستان میں موجود فتنہ الخوارج اور اس سے منسلک گروہوں کے ٹھکانوں کو مؤثر انداز میں نشانہ بنایا۔ کارروائی انتہائی منصوبہ بندی کے تحت کی گئی جس میں متعدد خوارج کی ہلاکتوں کی اطلاعات سامنے آئی ہیں۔ حکام کا کہنا ہے کہ نشانہ صرف مخصوص دہشتگرد مراکز کو بنایا گیا اور عام شہری آبادی کو نقصان سے بچانے کے لیے بھرپور احتیاط برتی گئی۔

وزارت اطلاعات کے مطابق ان حملوں کی ذمہ داری افغانستان میں موجود پاکستانی طالبان اور فتنہ الخوارج نے قبول کی تھی، جس کے بعد قومی سلامتی کے تقاضوں کے تحت کارروائی ناگزیر ہو گئی تھی۔ بیان میں کہا گیا کہ ’پاکستان اپنی سرزمین پر دہشتگردی برداشت نہیں کرے گا اور ہر حملے کا مؤثر جواب دیا جائے گا‘۔

یہ بھی پڑھیں:آج کے افغانستان میں بھی 2002 جیسا خطرہ منڈلانے لگا ہے، ماہر قومی سلامتی امور ڈاکٹر چیمہ کے اہم انکشافات

سماجی رابطوں کی ویب سائٹ پر جاری اپنے پیغام میں طارق فضل چوہدری نے لکھا کہ ’پاکستان کے ایک ایک کونے اور ایک ایک انچ کی حفاظت کو یقینی بنایا جائے گا‘۔ انہوں نے مزید کہا کہ ’ریاست پاکستان کی طرف اٹھنے والی ہر میلی آنکھ کو نیست و نابود کر دیا جائے گا‘۔ وفاقی وزیر نے ’پاکستان ہمیشہ زندہ باد‘ کا نعرہ بھی درج کیا اور فضائیہ کی کارروائی کو کامیاب قرار دیا۔

واضح رہے کہ حالیہ پیش رفت خطے کی صورتحال پر گہرے اثرات مرتب کر سکتی ہے۔ پاکستان نے واضح پیغام دیا ہے کہ دہشتگردی کے خلاف جنگ میں کوئی نرمی نہیں برتی جائے گی۔ سوشل میڈیا پر بھی اس کارروائی پر شدید ردعمل دیکھنے میں آیا اور بڑی تعداد میں صارفین نے سیکیورٹی فورسز کے اقدام کی حمایت کرتے ہوئے اسے ’فیصلہ کن قدم‘ قرار دیا۔