ایلون مسک کی ملکیت والے سوشل میڈیا پلیٹ فارم ایکس (سابقہ ٹوئٹر) کو جمعے کے روز دنیا بھر میں بڑے پیمانے پر تکنیکی خرابی کا سامنا کرنا پڑا، جس کے باعث لاکھوں صارفین پلیٹ فارم تک رسائی حاصل نہ کر سکے یا مختلف مسائل کا شکار رہے۔
آؤٹیج کی نگرانی کرنے والی ویب سائٹ ڈاؤن ڈیٹیکٹر کے مطابق امریکا میں صبح 10 بج کر 22 منٹ (ایسٹرن ٹائم) تک ایکس سے متعلق مسائل کی 62 ہزار سے زائد رپورٹس موصول ہو چکی تھیں۔ صارفین نے لاگ اِن نہ ہونے، ٹائم لائن لوڈ نہ ہونے اور پوسٹس میں تاخیر جیسے مسائل کی شکایات درج کروائیں۔
ڈاؤن ڈیٹیکٹر کی جانب سے جمع کیے گئے اعداد و شمار کے مطابق برطانیہ میں تقریباً 11 ہزار صارفین نے پلیٹ فارم تک رسائی میں مشکلات کی اطلاع دی، جبکہ بھارت میں تین ہزار سے زائد افراد نے سروس میں خلل کی شکایت کی۔ یہ ویب سائٹ مختلف ذرائع سے صارفین کی جانب سے موصول ہونے والی رپورٹس کو یکجا کر کے آؤٹیج کی مجموعی صورتحال ظاہر کرتی ہے۔
تاہم یہ بھی واضح کیا گیا ہے کہ متاثرہ صارفین کی اصل تعداد ڈاؤن ڈیٹیکٹر پر ظاہر ہونے والے اعداد و شمار سے مختلف ہو سکتی ہے، کیونکہ تمام صارفین آؤٹیج کے دوران رپورٹ درج نہیں کرتے اور یہ ڈیٹا خود صارفین کی جانب سے فراہم کیا جاتا ہے۔
تاحال سوشل میڈیا پلیٹ فارم ایکس کی جانب سے اس تکنیکی خرابی کی وجوہات یا سروس کی مکمل بحالی کے حوالے سے کوئی باضابطہ بیان سامنے نہیں آیا۔ صارفین کی بڑی تعداد سوشل میڈیا کے دیگر پلیٹ فارمز پر ایکس کی بندش اور مسائل پر تبصرے کرتی رہی، جبکہ بحالی سے متعلق غیر یقینی صورتحال برقرار رہی۔
By 
