بی ایل اے خواتین کوورغلا کر اپنے مقاصد کیلئے استعمال کرتی ہے ،مغوی خاتون کے شوہر کا بیان

بلوچستان کے شہری مائر ولد برکت اللہ نے اپنے ایک ویڈیو بیان میں کہا ہے کہ ان کی بیوی نرگس کو گزشتہ روز کالعدم تنظیم( بی ایل اے) نے مبینہ طور پر اغواء کر لیا ہےمائر نے کہا کہ یہ واقعہ 28 جنوری 2025 کو پیش آیا

مائر ولد برکت اللہ کا کہنا تھا کہ ان کی شادی نرگس کے ساتھ 2014 میں ہوئی تھی، تاہم ان کے مطابق ان کی بیوی 2017 سے کالعدم تنظیم کے ساتھ رابطے میں تھی۔
انہوں نے کہا کہ بارہا اپنی بیوی کو اس حوالے سے سمجھانے کی کوشش کی

مگر ان کے بقول اس کے باوجود وہ باز نہ آئیں۔ مائر کے بیان کے مطابق 28 جنوری 2025 کو ان کی بیوی کالعدم تنظیم کے افراد کے ساتھ چلی گئی ں۔
انہو ں نے اس واقعے پر شدید دکھ اور تشویش کا اظہار کرتے ہوئے کہا کہ کالعدم تنظیم(بی ایل اے) خواتین کو ورغلا کر اور بلیک میل کر کے اپنے مقاصد کے لیے استعمال کرتی ہے، جو ایک نہایت خطرناک رجحان ہے۔

یہ بھی پڑھیں :ضلع کیچ میں بی ایل اے کے دہشتگردوں نے اسلحہ کی نوک پر خاتون کو اغوا کرلیا، سیکیورٹی ادارے مغوی خاتون کی بازیابی کے لئے متحرک

مائر کا کہنا تھا کہ اس طرح کے واقعات نہ صرف خاندانوں کو متاثر کرتے ہیں بلکہ پورے معاشرے کے لیے سنگین خطرات پیدا کرتے ہیں۔

مائر ولد برکت اللہ نے عوام، اساتذہ، طلبہ، سیاستدانوں اور بلوچ قوم سے پرزور اپیل کی ہے کہ وہ سب مل کر اس کالعدم تنظیم کے خلاف آواز بلند کریں اور ان کا ساتھ دیں

انہوں نے کہا کہ بلوچ قوم اور عوام ان عناصر اور اس کالعدم تنظیم کے خلاف کھل کر بات کریں تاکہ ایسے گروہوں کا قلع قمع کیا جا سکے اور خواتین سمیت معاشرے کے کمزور طبقات کو تحفظ فراہم کیا جا سکے۔