وادی تیراہ میں شدید برف باری، پاک فوج کا ریلیف آپریشن بلاتعطل جاری

وادی تیراہ میں شدید برف باری کے باعث حالاتِ زندگی بری طرح متاثر ہو گئے ہیں، جس کے پیش نظر پاک فوج کی جانب سے ریلیف سرگرمیاں مسلسل جاری ہیں۔ مسلسل برف باری کے باعث معمولاتِ زندگی درہم برہم ہو گئے ہیں اور متعدد علاقے متاثر ہوئے ہیں۔

انتظامیہ کے مطابق مقامی آبادی کی مدد اور روزمرہ زندگی کی بحالی کے لیے پاک فوج کا ریلیف آپریشن بلاتعطل جاری ہے۔ امدادی کارروائیوں کے دوران برف میں پھنسنے والی متعدد گاڑیوں کو نکال کر محفوظ مقامات تک منتقل کیا گیا ہے تاکہ شہریوں کو مزید مشکلات سے بچایا جا سکے۔

پاک فوج اور فرنٹیئر کور (ایف سی) کے افسران اور جوان امدادی سرگرمیوں کی نگرانی کر رہے ہیں۔ متاثرہ علاقوں میں رہنے والے خاندانوں کو کھانا، کمبل اور ہنگامی طبی امداد فراہم کی جا رہی ہے۔ ان اقدامات پر مقامی شہریوں نے سکیورٹی فورسز کی کوششوں کو سراہا ہے اور ان کے بروقت ردعمل کو قابلِ تحسین قرار دیا ہے۔

انتظامیہ کے مطابق متاثرہ خاندانوں کو اشیائے ضروریہ بھی فراہم کی جا رہی ہیں تاکہ شدید سردی اور برف باری کے دوران انہیں بنیادی سہولیات میسر رہیں۔ پاک فوج کی پیشہ ورانہ حکمت عملی اور منظم امدادی کارروائیوں کے باعث علاقے میں زمینی رابطے بحال ہو چکے ہیں، جس سے امدادی سامان کی ترسیل اور نقل و حرکت میں آسانی پیدا ہوئی ہے۔

یہ بھی پڑھیں: وادی تیراہ کو فوج کے احکامات پر خالی کروانے کا دعویٰ بے بنیاد،حکومت نے گمراہ کن خبروں کا نوٹس لے لیا

حکام کا کہنا ہے کہ موسم کی صورتحال کے پیش نظر امدادی سرگرمیاں جاری رکھی جائیں گی اور مقامی آبادی کو ہر ممکن مدد فراہم کی جاتی رہے گی تاکہ معمولاتِ زندگی کو جلد از جلد بحال کیا جا سکے۔