سونے کی فی تولہ قیمت میں 10 ہزار 900 روپے کا بڑا اضافہ

ملک میں سونے کے نرخ میں ہزاروں روپے کا نمایاں اضافہ ریکارڈ کیا گیا ہے، جس کے بعد سونے کی قیمت تاریخ کی بلند ترین سطح پر پہنچ گئی ہے۔

صرافہ مارکیٹ کے مطابق فی تولہ سونے کی قیمت میں 10 ہزار 900 روپے کا بڑا اضافہ ہوا ہے، جس کے نتیجے میں نئی قیمت 5 لاکھ 32 ہزار 62 روپے ہو گئی ہے، جو اب تک کی بلند ترین سطح ہے۔

اسی طرح دس گرام سونے کی قیمت میں بھی 9 ہزار 345 روپے کا اضافہ ریکارڈ کیا گیا ہے۔ اس اضافے کے بعد پاکستان میں پہلی بار دس گرام سونے کے نرخ ساڑھے چار لاکھ روپے سے تجاوز کر گئے ہیں، اور نئی قیمت 4 لاکھ 56 ہزار 157 روپے کی سطح پر پہنچ گئی ہے۔ سونے کی قیمتوں میں اس غیر معمولی اضافے نے خریداروں اور سرمایہ کاروں کو تشویش میں مبتلا کر دیا ہے۔

عالمی مارکیٹ میں بھی سونے کی قیمتوں میں نمایاں تیزی دیکھی گئی ہے، جہاں فی اونس سونا 109 ڈالر مہنگا ہو گیا ہے۔ اس اضافے کے بعد عالمی سطح پر فی اونس سونے کی قیمت 5 ہزار 97 ڈالر کی بلند ترین سطح تک جا پہنچی ہے۔

یہ بھی پڑھیں: مہنگائی کے ستائے عوام کیلئے بری خبر، ملک میں آٹے کی قیمت میں ہوشربا اضافہ

سونے کے ساتھ ساتھ چاندی کی قیمتوں میں بھی ریکارڈ اضافہ سامنے آیا ہے۔ فی تولہ چاندی کی قیمت میں 627 روپے کا اضافہ ہونے سے نئی قیمت 11 ہزار 428 روپے کی ریکارڈ سطح پر پہنچ گئی ہے۔ چاندی کی قیمتوں میں یہ اضافہ بھی ملکی تاریخ کی بلند ترین سطح قرار دیا جا رہا ہے۔

صرافہ مارکیٹ میں سونے اور چاندی کی قیمتوں میں اس تیز رفتار اضافے کے باعث کاروباری سرگرمیوں پر بھی اثرات مرتب ہو رہے ہیں، جبکہ خریدار صورتحال پر گہری نظر رکھے ہوئے ہیں۔