لاہور میں دوسری انٹرنیشنل باکسنگ چیمپئن شپ کا آغاز 26 نومبر سے ہوگا

لاہور ایک بار پھر عالمی باکسنگ کا مرکز بننے جا رہا ہے، جہاں 26 سے 29 نومبر 2025 تک دوسری انٹرنیشنل باکسنگ چیمپئن شپ “فائٹ فار گلوری” منعقد ہو رہی ہے۔ یہ ایونٹ نہ صرف عالمی معیار کا اسپورٹس مقابلہ ہے بلکہ پاکستان کی بڑھتی ہوئی بین الاقوامی اسپورٹس ساکھ اور کھیلوں کے ذریعے سفارت کاری کے فروغ کی بھی نمایاں مثال ہے۔

مئی 2025 میں کوئٹہ میں پہلی انٹرنیشنل باکسنگ چیمپئن شپ کی شاندار کامیابی کے بعد لاہور میں اس ایونٹ کا انعقاد پاکستان کی میزبانی کی مضبوط صلاحیت اور اسپورٹس ترقی کے تسلسل کی علامت سمجھا جا رہا ہے۔

جناح اسپورٹس کمپلیکس لاہور گیریژن میں ہونے والی یہ چیمپئن شپ لاہور کور اور پاکستان باکسنگ فیڈریشن کے باہمی تعاون سے منعقد کی جا رہی ہے، جبکہ ورلڈ باکسنگ ایسوسی ایشن (WBA) کا تکنیکی تعاون اس ایونٹ کو بین الاقوامی معیار سے ہم آہنگ بناتا ہے۔ اس بار چیمپئن شپ میں 15 ممالک کے 44 پروفیشنل باکسرز حصہ لے رہے ہیں، جن میں 6 پاکستانی اور 38 بین الاقوامی فائٹرز شامل ہیں۔ کثیرالملکی شمولیت اس ایونٹ کو عالمی رنگ دینے کے ساتھ ساتھ مختلف ممالک کے درمیان ثقافتی ہم آہنگی اور اسپورٹس ڈپلومیسی کو بھی فروغ دیتی ہے۔

پاکستانی اسکواڈ میں معروف باکسر محمد وسیم، محمد وقاص، عاصم زمان اور محب اللہ شامل ہیں، جبکہ خواتین میں جانیہ اور کومل اخلاق پاکستان کی نمائندگی کریں گی۔ ان کی شمولیت ملک میں خواتین اسپورٹس کے بڑھتے ہوئے مقام اور باکسنگ کے شعبے میں ابھرتے ٹیلنٹ کی عکاس ہے۔ بین الاقوامی فائٹرز میں امریکہ کے پیٹر ڈوبسن اور اسٹیو جیفرارڈ، جرمنی کے کیون بوآکی، میکسیکو کے ایڈورڈو بائز اور جیسس ساراچو، برطانیہ کے متعدد کھلاڑیوں کے ساتھ ساتھ تھائی لینڈ، مراکش، فرانس، نیدرلینڈز، ارجنٹینا، جنوبی کوریا، فلپائن، گھانا اور نائیجیریا کے باکسرز بھی شامل ہیں۔ پاکستانی نژاد برطانوی باکسر لارا اکرام کی موجودگی بھی ایونٹ کی عالمی کشش کو بڑھا رہی ہے۔

یہ بھی پڑھیں: زمبابوے کرکٹ ٹیم سہ ملکی ٹی20 سیریز میں شرکت کے لیے پاکستان پہنچ گئی، ایئر پورٹ پر شاندار استقبال

چیمپئن شپ کا مقصد صرف مقابلے کروانا نہیں بلکہ پاکستان کا مثبت عالمی تشخص اجاگر کرنا، کھیل سفارت کاری کو فروغ دینا اور عالمی سطح پر ملک کے امن، استحکام اور کھیلوں کی میزبانی کی بھرپور صلاحیت کو نمایاں کرنا بھی ہے۔ اس ایونٹ سے پاکستان عالمی اسپورٹس حلقوں میں اپنا مقام مزید مستحکم کر رہا ہے اور یہ پیغام دے رہا ہے کہ ملک عالمی معیار کے مقابلوں کے لیے مکمل طور پر تیار ہے۔

لاہور میں اس موقع پر مختلف شعبوں سے تعلق رکھنے والی اہم شخصیات، سفارتی نمائندگان اور کھیلوں کے شائقین کی شرکت نہ صرف ایونٹ کی رونق میں اضافہ کرے گی بلکہ پاکستان کی بین الاقوامی ساکھ کو بھی تقویت دے گی۔ دوسری انٹرنیشنل باکسنگ چیمپئن شپ بلاشبہ پاکستان کی اسپورٹس ترقی، عالمی سطح کی میزبانی کی اہلیت اور امن و ہم آہنگی کے فروغ کا بہترین اظہار ہے، جو لاہور کو عالمی اسپورٹس کے نقشے پر نمایاں مقام عطا کرتا ہے۔