نئے سال کا شاندارآغاز، پاکستان اسٹاک ایکسچینج میں نیا ریکارڈ قائم

نئے سال 2026 کے پہلے ہی روز پاکستان اسٹاک ایکسچینج میں زبردست تیزی دیکھنے میں آئی، جہاں مارکیٹ نے نیا ریکارڈ قائم کر دیا۔ کاروباری ہفتے کے آغاز پر ہنڈریڈ انڈیکس 1338 پوائنٹس کے نمایاں اضافے کے ساتھ 175392 پوائنٹس کی بلند ترین سطح پر پہنچ گیا، جو ملکی تاریخ کی اب تک کی بلند ترین سطح قرار دی جا رہی ہے۔

یہ بھی پڑھیں:پاکستان اسٹاک ایکسچینج میں مثبت رجحان، پاکستانی روپے کی اڑان، ڈالر مزید سستا ہوگیا

معاشی ماہرین کے مطابق اسٹاک مارکیٹ میں اس غیر معمولی تیزی کی بڑی وجوہات میں سرمایہ کاروں کا بڑھتا ہوا اعتماد، معاشی اشاریوں میں بہتری کی توقعات اور نئے سال کے آغاز پر مثبت رجحان شامل ہیں۔ سرمایہ کاروں نے بڑے پیمانے پر حصص کی خریداری کی، جس کے نتیجے میں مارکیٹ میں سرگرمی نمایاں طور پر بڑھ گئی۔

دوسری جانب سال 2025 کے آخری روز کرنسی مارکیٹ میں امریکی ڈالر کی قدر میں معمولی کمی ریکارڈ کی گئی۔ اسٹیٹ بینک آف پاکستان کے مطابق انٹربینک مارکیٹ میں ڈالر کی قدر میں 3 پیسے کی کمی ہوئی، جس کے بعد ڈالر 280 روپے 12 پیسے پر بند ہوا۔

کرنسی ڈیلرز کا کہنا ہے کہ گزشتہ تقریباً 70 دنوں سے کرنسی مارکیٹ میں استحکام کا رجحان برقرار ہے اور ڈالر کی قدر میں روزانہ ایک یا 2 پیسے کی معمولی کمی دیکھی جا رہی ہے۔ ان کے مطابق یہ رجحان زرمبادلہ کے ذخائر میں بہتری اور درآمدی دباؤ میں کمی کا عکاس ہے۔

اوپن مارکیٹ میں ڈالر کی قیمت فروخت 281 روپے 15 پیسے پر برقرار رہی، جبکہ طلب و رسد میں کوئی غیر معمولی دباؤ دیکھنے میں نہیں آیا۔ ماہرین کا کہنا ہے کہ اگر موجودہ معاشی نظم و ضبط برقرار رہا تو آنے والے دنوں میں کرنسی مارکیٹ مزید مستحکم ہو سکتی ہے۔

مزید پڑھیں:بینکنگ شیئرز میں دلچسپی، پاکستان اسٹاک ایکسچینج نئی بلند ترین سطح پر پہنچ گئی

مجموعی طور پر نئے سال کے پہلے روز اسٹاک اور کرنسی دونوں مارکیٹوں میں مثبت پیش رفت نے سرمایہ کاروں اور کاروباری حلقوں میں امید کی نئی لہر دوڑا دی ہے، اور توقع کی جا رہی ہے کہ 2026 معاشی سرگرمیوں کے لیے ایک بہتر اور مستحکم سال ثابت ہوگا۔