پاکستان اسٹاک ایکسچینج میں کاروباری ہفتے کے چوتھے روز جمعرات کو سرمایہ کاروں کا رجحان مثبت رہا، جبکہ کرنسی مارکیٹ میں بھی ’روپے‘ کے مقابلے میں ’ڈالر‘ مزید سستا ہوگیا۔ مارکیٹ میں پائیدار بہتری کی امید اور کاروباری سرگرمیوں میں اضافہ سرمایہ کاروں کے اعتماد میں اضافہ کرتا دکھائی دیا۔
جمعرات کی صبح کاروبار کے آغاز پر ’کے ایس ای 100 انڈیکس‘ میں 355 پوائنٹس کا نمایاں اضافہ ریکارڈ کیا گیا، جس کے بعد انڈیکس ’1 لاکھ 66 ہزار 500 پوائنٹس‘ کی سطح پر پہنچ گیا۔ مارکیٹ ماہرین کے مطابق ابتدائی سیشن میں سرمایہ کاروں کی جانب سے مخصوص شعبوں میں بھرپور خریداری دیکھنے میں آئی، جس نے انڈیکس کو سنبھالا دیا۔
گزشتہ روز اسٹاک مارکیٹ کے پہلے سیشن میں انڈیکس نے ’1 لاکھ 68 ہزار‘ کی حد عبور کر لی تھی، تاہم کاروباری دن کے اختتام پر فروخت بڑھنے کے باعث انڈیکس منفی زون میں چلا گیا۔ تجزیہ کاروں کے مطابق اس اتار چڑھاؤ کی وجہ عالمی مارکیٹوں میں غیر یقینی صورتحال اور مقامی سیاسی حالات تھے، جس کے باعث سرمایہ کار محتاط رویہ اختیار کرتے رہے۔
ادھر کرنسی مارکیٹ میں بھی روپے کے لیے اچھی خبر سامنے آئی ہے۔ ’ایکسچینج کمپنیز ایسوسی ایشن‘ کے مطابق انٹر بینک میں ڈالر کی قدر میں مزید 6 پیسے کمی ریکارڈ کی گئی، جس کے بعد ڈالر ’280 روپے 40 پیسے‘ پر آگیا۔ معاشی ماہرین کا کہنا ہے کہ درآمدی دباؤ میں کمی، ترسیلات میں بہتری اور مارکیٹ میں طلب گھٹنے سے روپے کو سہارا ملا ہے۔
کاروباری حلقوں کے مطابق اگر اسٹاک مارکیٹ کا یہ مثبت تسلسل برقرار رہتا ہے تو آنے والے دنوں میں سرمایہ کاری کا حجم مزید بڑھ سکتا ہے، جبکہ ڈالر کی قدر میں کمی مہنگائی کے دباؤ کو بھی کم کر سکتی ہے۔
By 
