فیسکو کا 200 یونٹ تک بجلی استعمال کرنے والوں کو انتباہ

فیصل آباد الیکٹرک سپلائی کمپنی (فیسکو) نے 200 یونٹ تک بجلی استعمال کرنے والے پروٹیکٹڈ صارفین کو اہم ہدایت جاری کرتے ہوئے خبردار کیا ہے کہ وہ اپنے بجلی کے بل پر موجود کیو آر کوڈ کے ذریعے تصدیقی عمل جلد مکمل کرلیں، بصورت دیگر انہیں حکومتی سبسڈی سے محرومی کا سامنا کرنا پڑ سکتا ہے۔

فیسکو کے مطابق وزارت توانائی کی ہدایات اور چیف ایگزیکٹو آفیسر انجینئر محمد عامر کے احکامات پر صارفین کی رجسٹریشن اور ویریفکیشن کا عمل تیز کر دیا گیا ہے،اس اقدام کا مقصد مستحق صارفین کو کراس سبسڈی کی سہولت مسلسل فراہم کرنا اور سبسڈی کے نظام کو مزید شفاف، محفوظ اور ڈیجیٹل بنانا ہے۔

یہ بھی پڑھیں :200 یونٹس تک بجلی استعمال کرنے والے صارفین کے لیے بڑی خبر

فیسکو ترجمان محمد سعید رضا کے مطابق فیسکو ریجن میں حکومتی سبسڈی کے اہل پروٹیکٹڈ صارفین کی تعداد 39 لاکھ 51 ہزار 336 ہے، جن میں سے 17 لاکھ 13 ہزار 110 صارفین کیو آر کوڈ کے ذریعے کامیابی سے تصدیقی عمل مکمل کر چکے ہیں۔

ترجمان کے مطابق اب بھی 22 لاکھ 38 ہزار 126 صارفین نے اپنی ویریفکیشن مکمل نہیں کی، جس کے باعث مستقبل میں ان کی سبسڈی متاثر ہونے کا امکان ہے۔

فیسکو نے صارفین کو طریقہ کار بتاتے ہوئے کہا ہے کہ وہ اپنے تازہ بجلی کے بل پر موجود کیو آر کوڈ موبائل فون سے اسکین کریں، قومی شناختی کارڈ نمبر اور رجسٹرڈ موبائل نمبر درج کریں، جبکہ موصول ہونے والے ون ٹائم پاس ورڈ (او ٹی پی) کے ذریعے تصدیقی عمل مکمل کریں۔

یہ بھی پڑھیں :300 سے کم یونٹ بجلی استعمال کرنے والے صارفین کے لیے اہم خبر

فیسکو انتظامیہ کا کہنا ہے کہ ڈیجیٹل ویریفکیشن نظام کا مقصد سبسڈی کے غلط استعمال کی روک تھام اور حکومتی ریلیف کو حقیقی حقدار صارفین تک پہنچانا ہے۔

کمپنی نے صارفین کو خبردار کیا ہے کہ وہ صرف اپنے اصل بجلی کے بل پر موجود کیو آر کوڈ استعمال کریں اور کسی بھی جعلی ویب سائٹ، مشکوک لنک یا غیر مصدقہ ذریعے پر اپنی ذاتی معلومات ہرگز درج نہ کریں۔.