حکومت کا 29 جولائی کو عام تعطیل کا اعلان

حکومتِ سندھ نے عظیم صوفی بزرگ حضرت شاہ عبداللطیف بھٹائی رحمۃ اللہ علیہ کے سالانہ عرس مبارک کے موقع پر 29 جولائی کو صوبہ بھر میں عام تعطیل کا اعلان کر دیا ہے۔ اس روز سندھ کے تمام صوبائی سرکاری دفاتر، نیم سرکاری ادارے، خودمختار باڈیز، بلدیاتی کونسلز اور تعلیمی ادارے بند رہیں گے۔

تفصیلات کے مطابق محکمہ سروسز، جنرل ایڈمنسٹریشن اینڈ کوآرڈینیشن سندھ کی جانب سے جاری کردہ سرکاری نوٹیفیکیشن میں کہا گیا ہے کہ تعطیل کے فیصلے پر تمام متعلقہ محکمے مکمل عملدرآمد کو یقینی بنائیں تاکہ عرس کی تقریبات پرامن اور منظم انداز میں منعقد ہو سکیں۔

حضرت شاہ عبداللطیف بھٹائیؒ کا سالانہ عرس سندھ کی اہم ترین روحانی، مذہبی اور ثقافتی تقریبات میں شمار ہوتا ہے۔ اس موقع پر ضلع مٹیاری کے تاریخی شہر بھٹ شاہ میں واقع مزارِ اقدس پر ملک بھر سے ہزاروں عقیدت مند، علماء، اسکالرز، شعراء، ادباء اور موسیقار حاضری دیتے ہیں۔

یہ بھی پڑھیں: آٹا مزید مہنگا ہونے کا خدشہ، پنجاب اور سندھ نے لاکھوں ٹن گندم مانگ لی

عرس کی روایتی تقریبات میں قرآن خوانی، محفلِ سماع، ادبی کانفرنسیں، مشاعرے اور مختلف ثقافتی پروگرام شامل ہوتے ہیں، جن کے ذریعے حضرت شاہ عبداللطیف بھٹائیؒ کے امن، محبت، بھائی چارے اور مذہبی رواداری کے پیغام کو اجاگر کیا جاتا ہے۔

دوسری جانب عرس کے دوران زائرین کی بڑی تعداد کی آمد کے پیشِ نظر ضلعی انتظامیہ اور سندھ پولیس نے بھٹ شاہ اور گردونواح میں سخت سیکیورٹی انتظامات کیے ہیں۔

زائرین کی سہولت کے لیے خصوصی ٹریفک پلان، طبی کیمپس اور پینے کے صاف پانی کی فراہمی سمیت دیگر ضروری سہولیات بھی فراہم کی جا رہی ہیں تاکہ عرس میں شرکت کرنے والے افراد کو کسی قسم کی دشواری کا سامنا نہ کرنا پڑے۔