صدرِ مملکت آصف علی زرداری 3 روزہ سرکاری دورے پر قطر پہنچ گئے، جہاں حماد انٹرنیشنل ایئرپورٹ پر سینیئر قطری حکام اور پاکستان کے سفیر نے ان کا پُرتپاک استقبال کیا۔ صدرِ مملکت کو خوش آمدید کہنے کے لیے ایئرپورٹ پر گلدستہ بھی پیش کیا گیا۔
میڈیا رپورٹس کے مطابق صدر آصف علی زرداری اپنے دورے کے دوران دوحہ میں ہونے والی عالمی سماجی ترقیاتی کانفرنس میں پاکستان کی نمائندگی کریں گے۔ اس کانفرنس میں دنیا بھر کے رہنما، پالیسی ساز اور بین الاقوامی تنظیموں کے نمائندے شرکت کر رہے ہیں، جن میں سماجی تحفظ، غربت کے خاتمے، اور پائیدار ترقی کے موضوعات پر تفصیلی تبادلۂ خیال کیا جائے گا۔
صدرِ مملکت اپنے خطاب میں سماجی ترقی، جامع معاشی نمو، اور غربت میں کمی کے لیے پاکستان کے اقدامات پر روشنی ڈالیں گے۔ وہ کانفرنس کے شرکاء کو بینظیر انکم سپورٹ پروگرام (بی آئی ایس پی) کے کردار سے بھی آگاہ کریں گے، جو پاکستان میں کم آمدنی والے طبقے کو مالی معاونت فراہم کرنے والا سب سے بڑا سماجی تحفظ کا منصوبہ ہے۔
صدر زرداری یہ بھی بتائیں گے کہ پاکستان نے کس طرح سماجی تحفظ کے نظام کو ڈیجیٹلائزیشن اور شفافیت کے ذریعے مضبوط کیا ہے تاکہ امداد براہِ راست مستحق خاندانوں تک پہنچ سکے۔
میڈیا رپورٹ کے مطابق صدرِ مملکت دوحہ الائنس برائے سوشل پروٹیکشن اینڈ جابز کمپیکٹ کے آغاز سے متعلق اقدامات پر بھی گفتگو کریں گے۔ وہ عالمی ترقیاتی وعدوں سے ہم آہنگ منصوبوں، مالی وسائل کے مؤثر استعمال، اور اقوام متحدہ کے پائیدار ترقیاتی اہداف (ایس ڈی جیسز) کے حصول میں پاکستان کے کردار پر بھی روشنی ڈالیں گے۔
صدر زرداری اپنے قیام کے دوران مختلف عالمی اور علاقائی رہنماؤں کے علاوہ بین الاقوامی تنظیموں کے سربراہان سے بھی ملاقاتیں کریں گے۔ ان ملاقاتوں میں باہمی تعاون کے نئے امکانات، سرمایہ کاری کے مواقع، اور معاشی و سماجی ترقی کے لیے شراکت داری بڑھانے کے امور زیرِ غور آئیں گے۔
حکومتی ذرائع کا کہنا ہے کہ صدرِ مملکت کا یہ دورہ پاکستان اور قطر کے درمیان تعلقات کو مزید مضبوط بنانے کے ساتھ ساتھ عالمی سطح پر پاکستان کے ترقیاتی وژن کو اجاگر کرنے میں اہم کردار ادا کرے گا۔
By 
