پنجاب حکومت کی سرکاری کالجز پرائیویٹ سیکٹر کوفروخت کرنے کی پیشکش

سرکاری سکولوں کی نجکاری کے بعد پنجاب حکومت اب 71 پبلک سیکٹر کالجز پرائیویٹ سیکٹر کو فروخت کرنے کی پیشکش کر چکی ہے۔

تفصیلات کے مطابق راولپنڈی میں سابق وزیر داخلہ شیخ رشید احمد کی جانب سے راولپنڈی کی مختلف یونین کونسلز (UCs) میں قائم کیے گئے 18 خواتین کالجز کی فروخت کے لیے بھی عمل شروع کر دیا گیا ہے۔

صرف راولپنڈی ڈویژن کے اندر 25 کالجوں کو نجکاری کی فہرست میں رکھا گیا ہے۔ مجموعی طور پر، فروخت کے لیے مختص اداروں میں 38 بوائز کالجز، دو کو-ایجوکیشن کالجز، اور 31 گرلز کالجز شامل ہیں۔ راولپنڈی شہر میں گورنمنٹ گرلز کالج ڈھوک الٰہی بخش کو بھی آؤٹ سورس کیا جا رہا ہے۔

اس فہرست میں راولپنڈی ضلع کے چک بیلی خان اور ٹیکسلا کے بوائز کالجز، ضلع اٹک کے آٹھ کالجز اور ضلع مری کے تین کالجز شامل ہیں جن میں گورنمنٹ ایسوسی ایٹ گرلز کالج پھگواڑی، گورنمنٹ ایسوسی ایٹ گرلز کالج کوٹلی ستیاں اور گورنمنٹ ایسوسی ایٹ بوائز کالج کوٹلی ستیاں شامل ہیں۔ مزید برآں، ضلع چکوال کے پانچ، ضلع جہلم کے دو، اور ضلع تلہ گنگ کے تین کالجوں کو بھی شامل کیا گیا ہے۔

مزید پڑھیں: سرکاری اسکولوں کی نجکاری کے بعد پنجاب بھر میں کالجز کی نجکاری کی منظوری

سرکاری ذرائع کے مطابق جنوری 2026 میں نئے سال کے آغاز کے ساتھ ہی نجکاری کا عمل شروع ہو جائے گا تاہم اس فیصلے کی پروفیسرز اینڈ لیکچررز ایسوسی ایشن کی جانب سے شدید مخالفت کی گئی ہے جس نے موسم سرما کی تعطیلات کے بعد صوبہ بھر میں احتجاجی تحریک شروع کرنے کا اعلان کیا ہے۔

ڈویژن کے لحاظ سے نجکاری کے لیے پیش کیے گئے کالجوں میں بہاولپور ڈویژن میں چار، ڈیرہ غازی خان ڈویژن میں پانچ، فیصل آباد ڈویژن میں چھ، گوجرانوالہ ڈویژن میں نو، گجرات ڈویژن میں نو، ملتان ڈویژن میں دو، ساہیوال ڈویژن میں ایک، راولپنڈی ڈویژن میں 25 اور سرگودھا ڈویژن میں نو کالج شامل ہیں۔

نجکاری کے بعد ان اداروں کے لیکچررز اور پروفیسرز کو دوسرے سرکاری کالجوں میں خالی آسامیوں پر منتقل کر دیا جائے گا۔

پہلے فیز میں پرائیویٹ سیکٹر کو فروخت ہونیوالے پنجاب کے 71 کالجز کی فہرست جاری، لیہ سے گورنمنٹ ایسوسی ایٹ کالج برائے خواتین راجن شاہ شامل اسی طرح پنجاب کے وہ سرکاری کالجز جن میں طلبہ کی تعداد 150 سے کم ہے انہیں پرائیویٹ کیا جا رہا ہے*

پہلے فیز میں فروخت ہونیوالے پنجاب کے 71 کالجز کی ممکنہ فہرست سامنے آگئی ہے، لیہ سے گورنمنٹ ایسوسی ایٹ کالج برائے خواتین راجن شاہ کا نام شامل ہے۔