ملک میں سونے اور چاندی کی قیمتوں میں یکدم بڑی کمی

پاکستان بھر کی صرافہ مارکیٹس میں سونے اور چاندی کی قیمتوں میں اچانک بڑی کمی ریکارڈ کی گئی ہے، جس کے بعد سرمایہ کاروں اور خریداروں میں نئی بحث چھڑ گئی ہے۔

آل پاکستان صرافہ جیمز اینڈ جیولرز ایسوسی ایشن کے جاری کردہ تازہ نرخوں کے مطابق 24 قیراط فی تولہ سونے کی قیمت میں 9 ہزار روپے کی نمایاں کمی ہوئی ہے، جس کے بعد فی تولہ سونا 5 لاکھ 14 ہزار 762 روپے کی سطح پر آ گیا ہے۔ اسی طرح 10 گرام سونے کی قیمت میں 7 ہزار 716 روپے کمی ریکارڈ کی گئی اور نئی قیمت 4 لاکھ 41 ہزار 325 روپے مقرر ہوئی۔

یہ بھی پڑھیں:سونے اور چاندی سے متعلق بابا وانگا کی اہم پیشگوئی سامنے آگئی

ایسوسی ایشن کے مطابق 22 قیراط کے 10 گرام سونے کی قیمت بھی 7 ہزار 73 روپے کم ہو کر 4 لاکھ 4 ہزار 562 روپے ہو گئی ہے۔ ماہرین کا کہنا ہے کہ مقامی مارکیٹ میں یہ کمی بین الاقوامی قیمتوں میں گراوٹ اور ڈالر کی قدر میں اتار چڑھاؤ کے باعث دیکھنے میں آئی ہے۔

چاندی کی قیمتوں میں بھی کمی کا رجحان غالب رہا۔ 24 قیراط فی تولہ چاندی 150 روپے سستی ہو کر 8 ہزار 14 روپے پر آ گئی جبکہ 10 گرام چاندی کی قیمت 1 ہزار 298 روپے کمی سے 6 ہزار 870 روپے ہو گئی۔

دوسری جانب عالمی مارکیٹ میں بھی قیمتی دھاتوں کی قیمتوں میں نمایاں کمی دیکھی گئی۔ بین الاقوامی سطح پر سونے کی فی اونس قیمت 90 ڈالر کم ہو کر 4 ہزار 920 ڈالر پر آ گئی جبکہ چاندی کی قیمت 1.5 ڈالر کمی سے 75.30 ڈالر فی اونس ہو گئی۔

مزید پڑھیں:سونے کی فی تولہ قیمت آج کیا رہی ؟ چاندی کی اونچی اڑان جاری

مارکیٹ ذرائع کے مطابق عالمی سطح پر سرمایہ کاروں کی جانب سے منافع خوری، شرح سود سے متعلق توقعات اور عالمی معاشی حالات قیمتی دھاتوں کی قیمتوں پر اثر انداز ہو رہے ہیں۔ مقامی صرافہ ڈیلرز کا کہنا ہے کہ اگر عالمی منڈی میں یہی رجحان برقرار رہا تو آئندہ دنوں میں مزید کمی بھی متوقع ہو سکتی ہے۔

شہری حلقوں کا کہنا ہے کہ قیمتوں میں حالیہ کمی شادی سیزن سے قبل خریداروں کے لیے ریلیف ثابت ہو سکتی ہے، تاہم سرمایہ کار صورتحال پر گہری نظر رکھے ہوئے ہیں۔