وار ویٹرنز کی پریس کانفرنس: آپریشن بنیان مرصوص میں تاریخی فتح پر فیلڈ مارشل جنرل عاصم منیر کو خراج تحسین

ویب ڈیسک۔ وار ویٹرنز (سابق فوجی افسران) نے آپریشن بنیان مرصوص کے دوران بھارت کے خلاف پاکستان کی فیصلہ کن فتح پر قوم کو مبارکباد دی ہے اور فیلڈ مارشل سید عاصم منیر کی جرات مندانہ قیادت کو زبردست خراج تحسین پیش کیا ہے۔

پریس کانفرنس سے خطاب کرتے ہوئے سابق افسران نے کہا کہ اس مختصر دورانیے کی جنگ میں پاکستان کی مسلح افواج نے پیشہ ورانہ مہارت، بہادری اور جدید ٹیکنالوجی کے استعمال سے کئی گنا بڑی دشمن قوت کو شکست دی۔ انہوں نے کہا کہ یہ فتح صرف افواج پاکستان کی نہیں، بلکہ پوری قوم کے اتحاد، سیاسی و عسکری قیادت کی ہم آہنگی اور برادر ممالک کی بروقت حمایت کا نتیجہ تھی۔

وار ویٹرنز نے چین، ترکیہ، سعودی عرب اور آذربائیجان کا بطور خاص شکریہ ادا کیا اور کہا کہ ان برادر ممالک کی بروقت حمایت سے جنگ کا منظرنامہ بدل گیا۔ چین کو ہر موسم کا دوست قرار دیتے ہوئے ان کی اخلاقی اور تکنیکی حمایت کو سراہا گیا۔ انہوں نے امریکی صدر ڈونلڈ ٹرمپ کی ثالثی اور بروقت سفارتی مداخلت کو بھی خطے میں کشیدگی کم کرنے میں اہم قرار دیا۔

یہ بھی پڑھیں: تہران: آرمی چیف فیلڈ مارشل جنرل عاصم منیر سے ایرانی مسلح افواج کے چیف کی ملاقات

سابق فوجیوں کا کہنا تھا کہ پاکستان نے روایتی میدان سے ہٹ کر سائبر اسپیس، نیٹ ورک سینٹرک وارفیئر اور الیکٹرانک اسپییکٹرم وار میں بھی بھارت کو شکست دی۔ ان کا کہنا تھا کہ آج دنیا 40 برس بعد ایک بار پھر پاکستان کی بات سننے پر مجبور ہے۔

وائس ایڈمرل (ر) احمد تسنیم نے کہا کہ پاک بحریہ نے بھارت کے کراچی حملے کے منصوبے کو زیرِ آب آپریشنز اور کریکس ایریا میں بروقت تعیناتی سے ناکام بنایا۔ انہوں نے کہاکہ ہم نے یہ جنگ دماغ سے لڑی ہے۔ ان کا کہنا تھا کہ آج بھی وہی جذبہ دیکھنے کو ملا جو 1965 کے معرکوں میں دیکھا گیا تھا۔

ایئر وائس مارشل (ر) فہیم نے پی اے ایف کے کردار کو سراہتے ہوئے کہا کہ ایئر فورس نے دنیا کو حیران کر دیا۔ انہوں نے کہا کہ ایئر چیف نے اپنا بستر آپریشن روم میں لگایا اور  شوٹ اینڈ سروائیوکا نعرہ دیا۔ پاکستان نے بھارتی ایئر ڈیفنس سسٹم کو بھی کامیابی سے نشانہ بنایا۔

یہ بھی پڑھیں: سکیورٹی فورسز کے خلاف بے بنیاد اور گمراہ کن الزامات منظم اور گمراہ کن مہم کا حصہ ہیں، آئی ایس پی آر