اسلام آباد پولیس کی وزیراعلی سہیل آفریدی اور جنید اکبر کو گرفتار کرنے کی کوشش

اسلام آباد پولیس کی بھاری نفری جمعرات کی رات اچانک خیبرپختونخوا ہاؤس پہنچی۔ پولیس ٹیم کے پاس وزیراعلیٰ خیبرپختونخوا سہیل آفریدی اور پاکستان تحریک انصاف (پی ٹی آئی) کے صوبائی صدر جنید اکبر کے وارنٹ گرفتاری موجود تھے۔ ذرائع کے مطابق، پولیس کی آمد کا مقصد دونوں رہنماؤں کو گرفتار کرنا تھا۔

تاہم پولیس کے پہنچنے سے پہلے ہی وزیراعلیٰ خیبرپختونخوا سہیل آفریدی خیبرپختونخوا ہاؤس سے روانہ ہو چکے تھے۔ اطلاعات کے مطابق، پی ٹی آئی کے صوبائی صدر جنید اکبر بھی اس وقت خیبرپختونخوا ہاؤس میں موجود نہیں تھے، جس کے باعث پولیس کو مطلوبہ افراد وہاں نہیں مل سکے۔

پولیس حکام نے کارروائی کے دوران گرفتاری کے وارنٹس خیبرپختونخوا ہاؤس کی انتظامیہ کے حوالے کیے۔ وارنٹس کی رسمی کارروائی مکمل کرنے کے بعد پولیس نفری واپس روانہ ہو گئی۔

واقعے کے فوراً بعد پی ٹی آئی رہنما شاہد خٹک نے سماجی رابطے کی ویب سائٹ ایکس (سابقہ ٹوئٹر) پر بیان جاری کیا، جس میں انہوں نے کہا کہ وزیراعلیٰ خیبرپختونخوا سہیل آفریدی اس وقت پشاور میں موجود ہیں۔ ان کے مطابق، سہیل آفریدی اڈیالہ سے پشاور منتقل ہو چکے تھے اور پولیس کی کارروائی کے وقت اسلام آباد میں نہیں تھے۔

یہ بھی پڑھیں: وزیراعلیٰ سہیل آفریدی کی کور کمانڈر پشاور سے اکیلے ملاقات! کیا عمران خان سے اجازت لی تھی ؟ سوالات اٹھنے لگے