پنجاب ایجوکیشن فاؤنڈیشن کے پارٹنر سکولوں میں ہفتہ کی چھٹی کا اعلان

پنجاب ایجوکیشن فاؤنڈیشن (PEF) نے اپنے ماتحت تمام پارٹنر اسکولوں کے لیے ایک اہم اور طویل عرصے سے درکار فیصلہ کرتے ہوئے ہفتہ وار تعطیل کا باضابطہ اعلان کر دیا ہے۔ ترجمان پیف کے مطابق اس سے قبل پارٹنر اسکول ہفتے کے چھ دن کھلے رہتے تھے اور ہفتہ کی چھٹی نہیں دی جاتی تھی۔

اسکولوں کے اس طویل شیڈول پر متعدد سکول سربراہان اور والدین کی جانب سے مسلسل تحفظات ظاہر کیے جا رہے تھے، کیونکہ بچوں پر پڑھائی کا بوجھ بڑھنے کے باعث ان میں ذہنی تھکاوٹ اور کارکردگی میں کمی کے معاملات سامنے آ رہے تھے۔ انہی خدشات کے پیش نظر فاؤنڈیشن نے ہفتہ وار تعطیل شامل کرنے کا فیصلہ کیا ہے، تاکہ طلبہ کو مناسب آرام میسر آسکے۔

ہفتہ وار چھٹی کے ساتھ ساتھ پیف نے اسکولوں کے اوقاتِ کار میں بھی تبدیلی کا اعلان کیا ہے۔ جاری کردہ نئے شیڈول کے مطابق اب تمام پارٹنر اسکول صبح 8 بجکر 45 منٹ پر کھلیں گے اور دوپہر 1 بجکر 30 منٹ پر بند ہوں گے۔

یہ اوقات کار پیر سے جمعرات تک جاری رہیں گے۔ جمعہ کے روز اسکول کی چھٹی ساڑھے 12 بجے کر دی جائے گی، تاکہ نمازِ جمعہ کی ادائیگی میں آسانی ہو سکے اور طلبہ کو ہفتے کے آخری روز ہلکا تعلیمی شیڈول مل سکے۔

یہ بھی پڑھیں: چیئرمین پی سی بی محسن نقوی کا پنڈی اسٹیڈیم کا دورہ، پاکستان اور سری لنکن ٹیموں سے ملاقات

پیف نے واضح کیا ہے کہ نئے اوقاتِ کار اور ہفتہ وار تعطیل کا نفاذ 15 اپریل 2026 تک مؤثر رہے گا۔ اس مدت کے دوران انتظامیہ اس پالیسی کے مختلف پہلوؤں کا جائزہ لے گی، جن میں طلبہ کی کارکردگی، اساتذہ کی سہولت، والدین کے تاثرات اور مجموعی تعلیمی ماحول پر اس فیصلے کے اثرات شامل ہوں گے۔ اگر اس فیصلے کے نتائج مثبت رہے اور تمام متعلقہ اسٹیک ہولڈرز کی جانب سے اطمینان کا اظہار کیا گیا تو ممکن ہے کہ اسے مستقبل میں مستقل پالیسی کا حصہ بنا دیا جائے۔

پیف کے اس فیصلے کو والدین اور تعلیمی حلقوں کی جانب سے اہم پیش رفت قرار دیا جا رہا ہے، کیونکہ اس کا مقصد نہ صرف طلبہ کی ذہنی و جسمانی صحت میں بہتری لانا ہے بلکہ تعلیمی معیار کو بھی بہتر بنانا ہے۔ نئے ٹائم ٹیبل سے توقع کی جا رہی ہے کہ طلبہ تازہ دم ہو کر بہتر کارکردگی دکھا سکیں گے اور سکولوں میں تعلیمی ماحول مزید مؤثر ہو گا۔