کولمبو میں کھیلے گئے سپر آٹھ مرحلے کے ایک اہم مقابلے میں نیوزی لینڈ قومی کرکٹ ٹیم نے شاندار کارکردگی کا مظاہرہ کرتے ہوئے سری لنکا قومی کرکٹ ٹیم کو61 بھاری فرق سے شکست دے دی۔
سری لنکا کی شکست کےبعد گروپ کی صورتِ حال نے نیا رخ اختیار کر لیا ہے اور خصوصاً پاکستان کرکٹ ٹیم کی اگلے مرحلے تک رسائی نہایت دشوار ہو گئی ہے۔
سری لنکا نے ٹاس جیت کر پہلے بائولنگ کافیصلہ کیا، تاہم نیوزی لینڈ کے بلے بازوں نے احتیاط کے ساتھ کھیل پیش کیا اور مقررہ بیس اوورز میں سات کھلاڑیوں کے نقصان پر ایک سو اڑسٹھ رنز جوڑ لیے۔
مچل سینٹنر نے سینتالیس رنز کی ذمہ دارانہ باری کھیلی جبکہ میکونچی نے اکتیس رنز بنا کر مجموعے کو استحکام بخشا، دیگر کھلاڑیوں نے بھی وقتاً فوقتاً قیمتی رنز کا اضافہ کیا۔
ہدف کے تعاقب میں سری لنکا کی بیٹنگ ابتدا ہی سے دباؤ میں رہی ، نیوزی لینڈ کے گیند بازوں نے نہایت منظم اور مؤثر انداز اپنایا جس کے باعث سری لنکن بلے باز کھل کر نہ کھیل سکے۔
یوں مقررہ بیس دورانیوں کے اختتام پر سری لنکا کی ٹیم آٹھ کھلاڑیوں کے نقصان پر صرف ایک سو سات رنز بنا سکی اور اسے اکسٹھ رنز کی نمایاں شکست برداشت کرنا پڑی۔
اس ناکامی کے بعد سری لنکن ٹیم ورلڈ کپ سے باہر ہو گئی جبکہ اس فتح کے بعد نیوزی لینڈ کا رن ریٹ تین اعشاریہ صفر پانچ مثبت ہو گیا ہے جبکہ پاکستان کا تناسب منفی صفر اعشاریہ چھیالیس ہے، جو اس کے لیے تشویش کا باعث ہے۔
اب نیوزی لینڈ اپنا آخری میچ انگلینڈ کے خلاف کھیلے گا اور پاکستان کو سری لنکا کا سامنا کرنا ہے،اگر نیوزی لینڈ کو ا نگلینڈ کے ہاتھوں شکست ہوتی ہے تو پاکستان کے لیے امکانات کی ایک کرن باقی رہ سکتی ہے، تاہم اس صورت میں بھی پاکستان کو سری لنکا کے خلاف بڑے فرق سے کامیابی حاصل کرنا ہوگی۔
لیکن اگر نیوزی لینڈ نے ا نگلینڈ کو زیر کر لیا تو پاکستان کی ٹیم اپنا آخری مقابلہ کھیلنے سے پہلے ہی باہر ہو جائے گی،واضح رہے کہ اس گروہ سے ا نگلینڈ پہلے ہی اگلے مرحلے میں جگہ بنا چکا ہے، جس کے باعث باقی ٹیموں کے درمیان مقابلہ مزید سنسنی خیز ہو گیا ہے۔
By 
