کانز فلم فیسٹیول میں فاسٹ اینڈ فیوریس ری یونین، پال واکر کو خراج عقیدت

فرنچائز کی کاسٹ ایک خصوصی اینیورسری اسکریننگ کے لیے دوبارہ اکٹھی ہوئی۔ یہ شام مرحوم اداکار پال واکر کی یاد میں ایک جذباتی خراج عقیدت میں تبدیل ہوگئی، جہاں اداکار ون ڈیزل اپنے قریبی دوست کو یاد کرتے ہوئے آبدیدہ ہوگئے۔

تقریب کا سب سے یادگار لمحہ اس وقت سامنے آیا جب ون ڈیزل نے پال واکر کی بیٹی میڈو واکر کو گلے لگایا۔ اس موقع پر اداکارہ مشیل روڈریگز اور جورڈانا بریوسٹر بھی موجود تھیں۔ تھیٹر کے باہر مداحوں کی بڑی تعداد جمع تھی، جس نے اس اسکریننگ کو مزید یادگار بنا دیا۔

یہ بھی پڑھیں :ایشوریا رائے نے کانز میں جلوے بکھیر دیے، تصاویر وائرل

تھیٹر کے اندر خطاب کرتے ہوئے ون ڈیزل نے فرنچائز کے سفر اور پال واکر کے ساتھ اپنی دوستی کو یاد کیا۔ انہوں نے کہا کہ میڈو واکر کی موجودگی ان کے لیے بہت معنی رکھتی ہے، کیونکہ یہ اس رشتے کی علامت ہے جو انہوں نے اس فلم سیریز کے دوران بنایا تھا۔

اسکریننگ کے اختتام پر شائقین نے کھڑے ہو کر زبردست تالیاں بجائیں جبکہ کئی افراد جذباتی بھی نظر آئے۔ ون ڈیزل نے مداحوں کا شکریہ ادا کرتے ہوئے بتایا کہ فرنچائز کی آخری فلم ’’فاسٹ فارایور‘‘ اس وقت 2028 میں ریلیز کرنے کی منصوبہ بندی ہے۔