پاکستانی پاسپورٹ کا حصول مزید آسان، نئی فیس بھی جاری

دبئی میں پاکستانی سفارتخانے نے پاسپورٹ کے درخواست گزاروں کے لیے بڑا ریلیف دیتے ہوئے اعلان کیا ہے کہ اب پاسپورٹ کی خدمات حاصل کرنے کے لیے پیشگی اپائنٹمنٹ بک کرانے کی ضرورت نہیں ہوگی۔

دبئی میں پاکستان قونصلیٹ جنرل کی جانب سے جاری اعلامیے کے مطابق پاسپورٹ بنوانے کے خواہشمند درخواست دہندگان اب کسی بھی روز دفتری اوقات میں قونصل خانے آ کر درخواست جمع کرا سکتے ہیں۔

قونصل خانے کی جانب سے جاری پیغام میں بتایا گیا ہے کہ درخواست گزار پیر سے جمعرات تک صبح 7 بجے سے دوپہر ایک بجے کے درمیان پاسپورٹ کے لیے درخواست دے سکتے ہیں، جبکہ جمعہ کے روز یہ سہولت صبح 7 بجے سے صبح 11 بجے تک دستیاب ہوگی۔

قونصلیٹ نے واضح کیا کہ نظرثانی شدہ انتظامات کا مقصد درخواست دہندگان کو بغیر پیشگی شیڈولنگ کے پاسپورٹ خدمات تک براہ راست رسائی فراہم کرنا ہے۔

یہ بھی پڑھیں: پاکستان نے امریکہ اور ایران میں ثالث کا اہم کردار ادا کیا،وال اسٹریٹ جرنل

5 سالہ پاکستانی پاسپورٹ کی نئی فیس

شیڈول کے مطابق 36 صفحات پر مشتمل مشین ریڈ ایبل پاسپورٹ کے لیے عام پراسیسنگ کی فیس 110 درہم جبکہ فوری اجرا کی فیس 180 درہم مقرر کی گئی ہے۔

72 صفحات پر مشتمل پاسپورٹ کے لیے عام پراسیسنگ فیس 200 درہم رکھی گئی ہے، جبکہ فوری سروس کے لیے 325 درہم ادا کرنا ہوں گے۔

اسی طرح 100 صفحات پر مشتمل پاسپورٹ کے لیے عام کارروائی کی فیس 220 درہم جبکہ فوری اجرا کے لیے 435 درہم مقرر کی گئی ہے۔

یہ بھی پڑھیں: امریکا ایران مفاہمت میں پاکستان کا تاریخی کردار، صدر زرداری کی وزیرِاعظم و فیلڈ مارشل کی کاوشوں کی تعریف

10 سالہ پاکستانی پاسپورٹ کی نئی فیس

36 صفحات پر مشتمل پاسپورٹ کے لیے عام پراسیسنگ کی فیس 160 درہم جبکہ فوری اجرا کی فیس 270 درہم مقرر کی گئی ہے۔

72 صفحات کے پاسپورٹ کے لیے عام سروس کی فیس 300 درہم جبکہ فوری کارروائی کے لیے 485 درہم ادا کرنا ہوں گے۔

اس کے علاوہ 100 صفحات پر مشتمل پاسپورٹ کے زمرے میں عام پراسیسنگ کے لیے 325 درہم جبکہ فوری اجرا کے لیے 650 درہم فیس مقرر کی گئی ہے۔