پاکستان نے امریکہ اور ایران میں ثالث کا اہم کردار ادا کیا،وال اسٹریٹ جرنل

امریکی جریدے وال اسٹریٹ جرنل نے اپنی رپورٹ میں کہا ہے کہ ایران اور امریکہ کے درمیان ہونے والے معاہدے میں پاکستان نے اہم ثالثی کردار ادا کیا، جسے اسلام آباد کے لیے ایک بڑی سفارتی کامیابی قرار دیا جا رہا ہے۔

رپورٹ کے مطابق پاکستان نے دونوں ممالک کے درمیان رابطوں اور مذاکرات کو آگے بڑھانے میں مؤثر کردار ادا کیا، جبکہ اس پیش رفت کے نتیجے میں اسلام آباد کو عالمی ذرائع ابلاغ میں مثبت توجہ بھی حاصل ہوئی۔

وال اسٹریٹ جرنل نے لکھا کہ اس عمل کے بعد واشنگٹن اور اسلام آباد کے تعلقات میں نمایاں بہتری دیکھنے میں آئی ہے۔ رپورٹ میں یہ بھی کہا گیا کہ امریکی صدر ڈونلڈ ٹرمپ نے متعدد مواقع پر پاکستانی قیادت کی تعریف کی اور پاکستان کی سفارتی کوششوں کو سراہا۔

یہ بھی پڑھیں :پاکستان کی ثالثی اور سفارتی کوششیں، سعودی عرب کا ایک مرتبہ پھر حمایت کا اعادہ

جریدے کے مطابق اسلام آباد میں ہونے والے مذاکرات نے پاکستان کی بین الاقوامی اہمیت کو اجاگر کیا اور اسے خطے میں ایک ذمہ دار اور مؤثر سفارتی کردار ادا کرنے والے ملک کے طور پر پیش کیا۔ رپورٹ میں کہا گیا کہ پاکستان نے کشیدگی کم کرنے اور فریقین کو مذاکرات کی میز تک لانے کے لیے قابلِ ذکر کوششیں کیں۔

وال اسٹریٹ جرنل کے تجزیے کے مطابق ایران اور امریکہ کے درمیان معاہدہ پاکستان کے لیے ایک بڑی سفارتی کامیابی کے طور پر دیکھا جا رہا ہے، جس سے نہ صرف عالمی سطح پر پاکستان کا مثبت تشخص ابھرا بلکہ اہم عالمی طاقتوں کے ساتھ اس کے تعلقات میں بھی بہتری کی راہ ہموار ہوئی۔

دوسری طرف کل جنیوا میں ہونے والے معاہدے کے لیے وفود پہنچنا شروع ہوگئے ہیں ،امریکی جہاز برگن اسٹاک پہنچ گئے جبکہ پاکستان کی طرف سے بطور میزبان وزیر اعظم اور فیلڈ مارشل کی بھی جلد روانگی متوقع ہے ۔

وزیراعظم شہباز شریف اور فیلڈ مارشل سید عاصم منیر کی انتھک کاوشوں کے بعد بین الاقوامی سفارت کاری کے افق پر پاکستان نے اب تک کی سب سے بڑی اور تاریخی کامیابی حاصل کر لی ہے۔

وزیراعظم محمد شہباز شریف نے امریکا اور ایران کے درمیان طے پانے والے تاریخی جنگ بندی معاہدے یعنی ’اسلام آباد مفاہمتی یادداشت‘ (اسلام آباد میمورینڈم آف انڈرسٹینڈنگ) پر بطور ثالث (میڈی ایٹر) باضابطہ طور پر اپنے دستخط ثبت کر دیے ہیں۔

اس انتہائی اہم اور اسٹریٹجک دستاویز پر امریکی صدر ڈونلڈ ٹرمپ اور ایران کے صدر مسعود پزشکیان پہلے ہی اپنے الیکٹرانک دستخط کر چکے ہیں، جس کے بعد اب پاکستان کے وزیراعظم کے دستخط نے اس امن ڈیل کو حتمی اور تاریخی شکل دے دی ہے۔ یہ معاہدہ مشرقِ وسطیٰ سمیت دنیا بھر کو ایک ہولناک جنگ کے دہانے سے واپس لانے میں سنگ میل ثابت ہوگا۔

‘اسلام آباد مفاہمتی یادداشت’ کا مرکزی نقطہ اور پسِ پردہ کوششیں

اس تاریخ ساز معاہدے کو ’اسلام آباد مفاہمتی یادداشت‘ کا نام دیا جانا اس بات کا واضح ثبوت ہے کہ پاکستان کے دارالحکومت اسلام آباد نے اس پورے امن عمل کے مرکزی محور کے طور پر کام کیا ہے۔

اسلام آباد: 18 جون 2026.

وزیراعظم پاکستان محمد شہباز شریف نے اسلام آباد مفاہمتی یاداشت (Islamabad Memorandum of Understanding) پر بطور ثالث دستخط کردئے۔

اسلام آباد مفاہمتی یاداشت پر امریکی صدر ڈونلڈ ٹرمپ اور ایران کے صدر مسعود پزشکیان کے دستخط موجود ہیں۔ pic.twitter.com/af1F81DobA

— Prime Minister’s Office (@PakPMO) June 18, 2026

 ذرائع کے مطابق وزیراعظم شہباز شریف اور پاکستان کی عسکری و سفارتی قیادت خصوصاً فیلڈ مارشل سید عاصم منیر نے گزشتہ کئی ہفتوں سے تہران اور واشنگٹن کے مابین بالواسطہ مذاکرات اور سفارتی پیغامات کی ترسیل کے لیے انتھک پسِ پردہ کوششیں جاری رکھی ہوئی تھیں۔

یہ بھی پڑھیں:صدر مسعود پزشکیان نے امریکی صدر ٹرمپ کی دستخط شدہ ’اسلام آباد مفاہمتی یادداشت‘ کی کاپی میڈیا پر شیئر کردی

اس مفاہمتی یادداشت کے تحت دونوں حریف ممالک عارضی طور پر جنگ بندی اور کشیدگی کے خاتمے پر راضی ہوئے ہیں، جس میں سیکیورٹی معاملات کے حل کے لیے مزید 60 دن کی توسیع کی گئی ہے تاکہ سوئزرلینڈ میں ہونے والی باضابطہ تقریب کے دوران حتمی اور مستقل معاہدے کی راہ ہموار کی جا سکے۔

امریکا ایران سفارتی تعطل اور پاکستان کا روایتی کردار

امریکا اور ایران کے تعلقات دہائیوں سے شدید ترین تناؤ کا شکار رہے ہیں، تاہم حالیہ مہینوں میں مشرقِ وسطیٰ کی دگرگوں صورتحال اور بحری تجارتی راستوں پر حملوں کے باعث یہ کشیدگی آخری حدوں کو چھو رہی تھی۔ صدر ڈونلڈ ٹرمپ کی سخت گیر پالیسیوں اور ایران کے جوابی اقدامات کے باعث خطہ ایک بڑی علاقائی جنگ کے دھانے پر کھڑا تھا،پاکستان کے ایران کے ساتھ برادرانہ پڑوسی تعلقات ہیں جبکہ امریکا کے ساتھ بھی اس کے دیرینہ سیکیورٹی اور سفارتی روابط قائم ہیں۔

ماضی میں بھی پاکستان نے خلیجی ممالک اور ایران کے مابین غلط فہمیاں دور کرنے میں پل کا کردار ادا کیا تھا، لیکن یہ ملکی تاریخ کا پہلا موقع ہے کہ کسی عالمی جنگ بندی معاہدے کا باقاعدہ نام پاکستان کے دارالحکومت ’اسلام آباد‘ سے منسوب ہوا ہے اور پاکستانی وزیراعظم نے اس پر بطور ضامن دستخط کیے ہیں۔

پاکستان کا بطور ‘عالمی ثالث’ ابھرنا

اس معاہدے پر دستخط کر کے پاکستان نے ثابت کر دیا ہے کہ اس کی خارجہ پالیسی اب صرف خطے تک محدود نہیں رہی بلکہ وہ عالمی بحرانوں کو حل کرنے کی بھرپور صلاحیت رکھتا ہے۔ ’اسلام آباد مفاہمتی یادداشت‘  پر دستخط پاکستان کی ’سافٹ پاور‘ کو دنیا بھر میں ایک نئی بلندی فراہم کریں گے۔

امریکی اور ایرانی اعتماد کا مظہر

 صدر ڈونلڈ ٹرمپ جیسے سخت گیر رہنما اور ایرانی صدر مسعود پزشکیان کا پاکستان کی ثالثی پر مکمل اتفاق کرنا اور اس دستاویز پر دستخط کرنا یہ ظاہر کرتا ہے کہ دونوں ممالک پاکستان کی سیکیورٹی اور سفارتی قیادت کی ساکھ اور غیر جانبداری پر کس قدر گہرا اعتماد کرتے ہیں۔

مزید پڑھیں:ٹرمپ اور ایرانی صدر نے مفاہمتی یادداشت پر دستخط کر دئیے ،معاہدہ نافذ العمل ہو گیا

ملکی معیشت پر مثبت اثرات

عالمی برادری میں پاکستان کا یہ بڑا سفارتی بریک تھرو ملکی معیشت کے لیے بھی خوش آئند ہے۔ اس تاریخی کردار کے بعد پاکستان کے دوست ممالک (سعودی عرب، قطر، متحدہ عرب امارات) اور عالمی مالیاتی اداروں کی نظر میں پاکستان کی اہمیت اور معاشی ساکھ مزید مضبوط ہوگی، جس سے سرمایہ کاری کی راہیں کھلیں گی۔

مستقبل کی جیو-اکنامکس

اس معاہدے کے بعد پاک-ایران گیس پائپ لائن جیسے رکے ہوئے منصوبوں اور سی پیک کے تحت علاقائی روابط کو دوبارہ فعال کرنے میں حائل امریکی پابندیوں کے دباؤ میں کمی آنے کی قوی امید پیدا ہو گئی ہے۔