اپنے وعدے پورے کریں یا پھر اسکی قیمت چکائیں، باقرقالیباف کا امریکا کو دوٹوک پیغام

ایران کے اعلیٰ مذاکرات کار اور اسپیکر پارلیمنٹ محمد باقر قالیباف نے کہا ہے کہ یکطرفہ معاہدوں کا دور ختم ہو چکا ہے۔

سوشل میڈیا پلیٹ فارم ایکس (X) پر جاری اپنے بیان میں انہوں نے لکھا کہ ہم نے پہلے ہی کہا تھا یا اپنے وعدے پورے کریں یا پھر اس کی قیمت چکائیں۔

انہوں نے مزید کہا کہ حقیقت اب دروازہ کھٹکھٹا رہی ہے۔

قالیباف نے اپنی پوسٹ کے ساتھ مفاہمتی یادداشت (MoU) کے آرٹیکل 5 کی تصویر بھی شیئر کی، جس میں آبنائے ہرمز کو دوبارہ کھولنے سے متعلق شق موجود ہے۔

تصویر میں اسلامی جمہوریہ ایران انتظامات کرے گا کے الفاظ کو نمایاں کیا گیا ہے۔

The era of one-sided deals is OVER. We told you: keep your word or pay the price. Reality is knocking. pic.twitter.com/B97ogCYGaj

— محمدباقر قالیباف | MB Ghalibaf (@mb_ghalibaf) July 12, 2026

یاد رہے کہ حالیہ کشیدگی اور حملوں کا آغاز امریکا اور ایران کے درمیان آبنائے ہرمز میں بحری جہازوں کی آمد و رفت کے کنٹرول اور انتظامی امور پر اختلافات کے بعد ہوا۔

یہ بھی پڑھیں : امریکا جنگ بندی پر عمل نہیں کر رہا، بحری ناکہ بندی اور لبنان میں جنگی جرائم اس کا ثبوت ہیں: باقر قالیباف

اس سے قبل ایک بیان میں باقر قالیباف کا کہنا تھا کہ ایرانی قیادت اور عوام ڈٹ کر کھڑے ہوں گے اور اپنے قومی و عوامی حقوق کا ہر قیمت پر دفاع کریں گے۔ یہ بات سب کو معلوم ہونی چاہیے کہ دباؤ کی پالیسی کام نہیں آئے گی۔

باقر قالیباف نے خطے کی موجودہ صورتحال کے تناظر میں زور دیا کہ تمام مسلم اقوام کو متحد ہو کر امریکہ اور اسرائیل کے جارحانہ اقدامات کے خلاف ایک مضبوط اور مشترکہ مؤقف اپنانا چاہیے۔

یہ بھی پڑھیں :اسلام آباد مفاہمتی یادداشت کی تمام شقیں ہمارے مفاد میں ہیں، ایرانی صدر مسعود پزشکیان

انہوں نے واضح کیا کہ اس وقت جنگ کا خاتمہ دنیا کے تمام ممالک کے لیے اولین ترجیح ہونی چاہیے، لیکن امن کا مطلب کمزوری یا سرینڈر کرنا ہرگز نہیں ہے۔