وینس پانی پر نہیں تیرتا، جانیں ہزار سال پرانی حیرت انگیز تعمیراتی حقیقت

اٹلی کا تاریخی شہر وینس بظاہر پانی پر تیرتا ہوا دکھائی دیتا ہے، لیکن حقیقت اس سے کہیں زیادہ دلچسپ ہے۔ یہ شہر دراصل لکڑی کے لاکھوں مضبوط ستونوں پر قائم ہے، جو صدیوں پہلے جھیل کی نرم تہہ میں گہرائی تک نصب کیے گئے تھے۔

ماہرین کے مطابق ان لکڑی کے ستونوں کو پانی کے اندر ایسے ماحول میں رکھا گیا جہاں آکسیجن کی مقدار انتہائی کم ہے۔ اسی وجہ سے لکڑی گلنے سڑنے سے محفوظ رہی اور اسے نقصان پہنچانے والے جراثیم اور جاندار فعال نہیں ہو سکے۔

یہ بھی پڑھیں:400 سالہ بونسائی کی چوری، مالک کی چوروں سے منفرد اپیل

ان ستونوں کے اوپر پتھر اور سنگِ مرمر کی مضبوط تہیں تعمیر کی گئیں، جو عمارتوں کا وزن یکساں طور پر بنیاد تک منتقل کرتی ہیں۔ اس طرح وینس پانی پر تیرنے کے بجائے جھیل کی تہہ میں گڑے لکڑی کے ستونوں کے ایک وسیع اور مضبوط نظام پر کھڑا ہے۔

ماہرین کا کہنا ہے کہ یہی منفرد تعمیراتی تکنیک وینس کو ایک ہزار سال سے زائد عرصے تک محفوظ رکھنے میں اہم کردار ادا کر رہی ہے۔ آج بھی یہ شہر انسانی انجینئرنگ، تعمیراتی مہارت اور قدرتی ماحول سے ہم آہنگ منصوبہ بندی کی شاندار مثال سمجھا جاتا ہے۔