عالمی مارکیٹ میں بدھ کے روز سونے کی قیمتوں میں کمی ریکارڈ کی گئی جبکہ ایک روز قبل سونا 2 فیصد سے زائد اضافے کے بعد بلند سطح کے قریب پہنچ گیا تھا۔ ماہرین کے مطابق خام تیل کی بڑھتی ہوئی قیمتوں اور امریکی شرح سود کے مستقبل سے متعلق غیر یقینی صورتحال کے باعث سونے پر فروخت کا دباؤ دیکھنے میں آیا۔
اسپاٹ گولڈ کی قیمت 0.5 فیصد کمی کے بعد 4,035.67 ڈالر فی اونس رہی جبکہ اگست ڈیلیوری کے امریکی گولڈ فیوچر 0.7 فیصد کمی کے ساتھ 4,042.20 ڈالر فی اونس پر آ گئے۔
منگل کے روز امریکی صارفین کی مہنگائی سے متعلق اعداد و شمار توقع سے بہتر آنے کے بعد سونے کی قیمت میں 2 فیصد سے زائد اضافہ ہوا تھا اور یہ 4,100.49 ڈالر فی اونس تک پہنچ گئی تھی۔
ایران سے متعلق امریکی اقدامات اور مشرقِ وسطیٰ میں بڑھتی ہوئی کشیدگی کے باعث خام تیل مہنگا ہو رہا ہے جس سے مستقبل میں مہنگائی دوبارہ بڑھنے کا خدشہ پیدا ہو گیا ہے۔ ایسی صورت حال میں امریکی فیڈرل ریزرو کی جانب سے شرح سود بلند سطح پر برقرار رکھنے کے امکانات بھی مضبوط ہوئے ہیں جس کے باعث سونے کی قیمتوں پر دباؤ برقرار ہے۔
دیگر قیمتی دھاتوں میں چاندی کی قیمت 0.3 فیصد کمی کے بعد 58.48 ڈالر فی اونس رہی جبکہ پلاٹینم 0.2 فیصد اضافے کے ساتھ 1,635.56 ڈالر اور پیلیڈیم 0.2 فیصد اضافے کے بعد 1,307.11 ڈالر فی اونس پر پہنچ گیا۔
By 
