واٹس ایپ اکاؤنٹ محفوظ رکھنے کے لیے یہ غلطی ہرگز نہ کریں

اگر آپ کا واٹس ایپ اکاؤنٹ اچانک عارضی طور پر بلاک یا لاگ آؤٹ ہوگیا ہے اور آپ اسے استعمال نہیں کر پا رہے تو گھبرانے کی ضرورت نہیں۔

واٹس ایپ دنیا کی مقبول ترین پیغام رسانی ایپس میں شامل ہے اور پاکستان سمیت دنیا بھر میں کروڑوں افراد روزانہ اس کے ذریعے رابطہ کرتے ہیں۔ اکاؤنٹ تک رسائی ختم ہونے کی صورت میں چند اہم اقدامات آپ کے اکاؤنٹ کو محفوظ رکھنے میں مدد دے سکتے ہیں۔

سب سے پہلے فون اور واٹس ایپ اپ ڈیٹ کریں

اپنے موبائل فون میں موجود آپریٹنگ سسٹم کی تازہ ترین اپ ڈیٹ انسٹال کریں۔ اس کے ساتھ یہ بھی یقینی بنائیں کہ آپ کے فون میں واٹس ایپ کا تازہ ترین آفیشل ورژن موجود ہے۔ واٹس ایپ صرف گوگل پلے اسٹور یا ایپل ایپ اسٹور سے ڈاؤن لوڈ کریں اور غیر سرکاری ذرائع سے ایپ انسٹال کرنے سے گریز کریں۔

یہ بھی پڑھیں:اوپن اے آئی کا چیٹ جی پی ٹی کا نیا ماڈل لانچ نہ کرنے کا فیصلہ ، وجہ سامنے آگئی

موڈیفائیڈ واٹس ایپ استعمال نہ کریں

واٹس ایپ کے غیر سرکاری یا موڈیفائیڈ ورژنز استعمال نہ کریں۔ ایسی ایپس اکاؤنٹ کی سکیورٹی کے لیے خطرہ بن سکتی ہیں اور اکاؤنٹ تک رسائی میں مسائل پیدا ہوسکتے ہیں۔ اپنے فون میں موجود غیر معروف اور مشکوک ایپس بھی چیک کریں اور ایسی ایپس کو ہٹا دیں جنہیں آپ استعمال نہیں کرتے یا جن پر اعتماد نہیں کرتے۔

اینڈرائیڈ صارفین یہ کام ضرور کریں

اگر آپ اینڈرائیڈ فون استعمال کرتے ہیں تو گوگل پلے پروٹیکٹ کو فعال رکھیں۔ یہ فون میں موجود نقصان دہ ایپس کی شناخت میں مدد فراہم کرتا ہے۔ اگر آپ کو شبہ ہے کہ فون یا واٹس ایپ اکاؤنٹ کی سکیورٹی متاثر ہوئی ہے تو اہم ڈیٹا کا بیک اپ لینے کے بعد فون کو فیکٹری ری سیٹ کرنے پر بھی غور کیا جاسکتا ہے۔

یہ بھی پڑھیں:نظام شمسی کیسے بنا؟ نئی تحقیق نے اہم راز کھول دیا

مسئلہ برقرار رہے تو کیا کریں؟

اگر تمام اقدامات کے باوجود واٹس ایپ اکاؤنٹ تک رسائی بحال نہ ہو تو واٹس ایپ کی آفیشل سپورٹ سے رابطہ کریں۔ اگر معاملہ سکیورٹی یا ٹیلی کمیونیکیشن سے متعلق ہو اور مسئلہ حل نہ ہو تو مزید رہنمائی کے لیے پاکستان ٹیلی کمیونیکیشن اتھارٹی سے بھی رابطہ کیا جاسکتا ہے۔ اکاؤنٹ کی حفاظت کے لیے ہمیشہ واٹس ایپ کا آفیشل ورژن استعمال کریں اور کسی بھی غیر معروف ایپ یا لنک کے ذریعے اپنی ذاتی معلومات فراہم نہ کریں۔