نظام شمسی کیسے بنا؟ نئی تحقیق نے اہم راز کھول دیا

سائنس دانوں نے نظام شمسی کے ابتدائی دور سے متعلق ایک اہم سوال کا سراغ لگا لیا ہے۔ نئی تحقیق کے مطابق نظام شمسی کی تشکیل کے ابتدائی مرحلے میں شدید حرارتی واقعات نے اہم کردار ادا کیا اور خلا میں موجود مادہ کئی مرتبہ انتہائی درجہ حرارت سے متاثر ہوا۔

ییل یونیورسٹی کے شعبہ ارضی و سیاروی علوم کے اسسٹنٹ پروفیسر دمن ویر گریوال اور ان کے ساتھی محققین نے نظام شمسی کے ابتدائی ماحول کو سمجھنے کے لیے مختلف قدیم مادوں کا جائزہ لیا۔

سائنس دانوں نے کن مادوں کا مطالعہ کیا؟

تحقیق میں خاص طور پر دو طرح کے مادوں پر توجہ دی گئی، جنہیں کونڈرولز اور میٹرکس کہا جاتا ہے۔ کونڈرولز انتہائی چھوٹے پتھریلے ذرات ہیں جو شدید حرارت کے نتیجے میں بنتے ہیں، جبکہ میٹرکس نسبتاً نرم اور گرد آلود مادے پر مشتمل ہوتا ہے۔ اس میں پانی کی برف سمیت ایسے اجزا بھی شامل ہوسکتے ہیں جو حرارت کے اثر سے تبدیل ہوجاتے ہیں۔

یہ بھی پڑھیں:کیا موبائل ہاٹ اسپاٹ سے بھی ڈیٹا ہیک ہوسکتا ہے؟ حقیقت جانیں

خلا میں موجود گرد کیسے پتھریلے ذرات بنی؟

سائنس دانوں کے مطابق ابتدائی نظام شمسی میں موجود گرد کے ذرات کو طاقتور حرارتی واقعات اور شدید جھٹکوں کا سامنا کرنا پڑا۔ شدید حرارت کے باعث یہ ذرات پگھل کر انتہائی چھوٹی مائع بوندوں میں تبدیل ہوئے۔ اس کے بعد جب یہ مادہ تیزی سے ٹھنڈا ہوا تو ننھے پتھریلے ذرات وجود میں آئے، جنہیں کونڈرولز کہا جاتا ہے۔

نظام شمسی کے پہلے 10 لاکھ سال اہم قرار

سائنس دان پہلے ہی یہ جانتے تھے کہ نظام شمسی کی تشکیل کے تقریباً 20 لاکھ سے 40 لاکھ سال بعد کونڈرولز میں شدید حرارت کے آثار موجود تھے۔ نئی تحقیق میں اس سے بھی پہلے کے دور پر توجہ دی گئی اور نظام شمسی کے ابتدائی 10 لاکھ سال کا جائزہ لیا گیا۔

یہ بھی پڑھیں:کیا موبائل ہاٹ اسپاٹ سے بھی ڈیٹا ہیک ہوسکتا ہے؟ حقیقت جانیں

تحقیق کے نتائج سے معلوم ہوتا ہے کہ نظام شمسی کی تشکیل کے بالکل ابتدائی مرحلے میں بھی شدید حرارتی واقعات موجود تھے اور انہوں نے وہاں موجود مادے کی تشکیل اور تبدیلی میں اہم کردار ادا کیا۔

سائنس دانوں کے مطابق یہ تحقیق نظام شمسی کے ابتدائی ماحول کو سمجھنے اور یہ جاننے میں مدد دے سکتی ہے کہ سیارے اور دیگر خلائی اجزا وجود میں آنے سے پہلے خلا میں موجود مادے نے کس طرح مختلف مراحل طے کیے۔